Хитай даирилири йәнә 3 нәпәр өлкә дәриҗилик әмәлдарни вәзиписидин қалдурди

Мухбиримиз меһрибан
2015-07-31
Елхәт
Пикир
Share
Принт


Хитай мәркизи интизам тәкшүрүш кометити 31 - июл җүмә күни әтигән уқтуруш чиқирип, җяңсу өлкилик парткомниң даими һәйити, нәнҗиң шәһириниң сабиқ партком секритари яң вейзе, ички моңғул аптоном райониниң сабиқ сиясий кеңәш рәиси, ички моңғул җ х назаритиниң сабиқ партком секритари, назарәт башлиқи җав липиң, йүннән өлкисиниң сабиқ муавин партком секритари җю хе қатарлиқларниң интизамға еғир дәриҗидә хилаплиқ қилмиши сәвәблик барлиқ вәзипилиридин қалдурулуп, қанун орунлириға тапшурулғанлиқини елан қилди.

Хәвәрдин мәлум болушичә, бу 3 нәпәр өлкә дәриҗилик әмәлдардин нәнҗин шәһириниң муавин партком секритари яң вейзе вә йүннән өлкисиниң муавин партком секритари җю хе қатарлиқ иккәйлән, хитайниң 18 - қурултийидин кейин парихорлуқ қилмиши башқилар тәрипидин паш қилинғандин кейин, тәкшүрүлүшкә башлиған. Ички моңғул җ х назаритиниң партком секритари вә назирилиқ вәзиписини өтәп пенсийигә чиққан җав липиң болса бу йил 3 - айниң 20 - күни ички моңғулниң чи фиң шәһиридә қәстән адәм өлтүрүш җинайити билән қолға елинған.

Хитай мәркизи интизам тәкшүрүш комитети техи түнүгүнла мәркизий һәрбий комитетиниң сабиқ муавин рәиси го бошуңниң 30 - июл күни хитай компартийисидин қоғлап чиқирилғанлиқини елан қилған иди. Мәлум болишичә 2013 - йили йил ахири башланған «парихорлуққа зәрбә бериш» һәрикитидә һазирға қәдәр 50 тин артуқ өлкә дәриҗилик әмәлдар, 20 гә йеқин министир дәриҗилик әмәлдар, 10 нәччә юқири дәриҗилик һәрбий әмәлдар вәзиписидин қалдурулған. Уларниң бәзилири қанун орунлириға тапшурулуп, қамақ җазалириға һөкүм қилинған.

Пикирләр (0)
Share
Толуқ бәт