Xitay da'iriliri yene 3 neper ölke derijilik emeldarni wezipisidin qaldurdi

Muxbirimiz méhriban
2015-07-31
Élxet
Pikir
Share
Print


Xitay merkizi intizam tekshürüsh kométiti 31 - iyul jüme küni etigen uqturush chiqirip, jyangsu ölkilik partkomning da'imi hey'iti, nenjing shehirining sabiq partkom sékritari yang wéyzé, ichki mongghul aptonom rayonining sabiq siyasiy kéngesh re'isi, ichki mongghul j x nazaritining sabiq partkom sékritari, nazaret bashliqi jaw liping, yünnen ölkisining sabiq mu'awin partkom sékritari jyu xé qatarliqlarning intizamgha éghir derijide xilapliq qilmishi seweblik barliq wezipiliridin qaldurulup, qanun orunlirigha tapshurulghanliqini élan qildi.

Xewerdin melum bolushiche, bu 3 neper ölke derijilik emeldardin nenjin shehirining mu'awin partkom sékritari yang wéyzé we yünnen ölkisining mu'awin partkom sékritari jyu xé qatarliq ikkeylen, xitayning 18 - qurultiyidin kéyin parixorluq qilmishi bashqilar teripidin pash qilin'ghandin kéyin, tekshürülüshke bashlighan. Ichki mongghul j x nazaritining partkom sékritari we naziriliq wezipisini ötep pénsiyige chiqqan jaw liping bolsa bu yil 3 - ayning 20 - küni ichki mongghulning chi fing shehiride qesten adem öltürüsh jinayiti bilen qolgha élin'ghan.

Xitay merkizi intizam tekshürüsh komitéti téxi tünügünla merkiziy herbiy komitétining sabiq mu'awin re'isi go boshungning 30 - iyul küni xitay kompartiyisidin qoghlap chiqirilghanliqini élan qilghan idi. Melum bolishiche 2013 - yili yil axiri bashlan'ghan "Parixorluqqa zerbe bérish" herikitide hazirgha qeder 50 tin artuq ölke derijilik emeldar, 20 ge yéqin ministir derijilik emeldar, 10 nechche yuqiri derijilik herbiy emeldar wezipisidin qaldurulghan. Ularning beziliri qanun orunlirigha tapshurulup, qamaq jazalirigha höküm qilin'ghan.

Toluq bet