Dalay lama xitay hökümiti qoshulsila özining tibetke qaytip kétidighanliqini bildürdi

Muxbirimiz ümidwar
2017-11-19
Élxet
Pikir
Share
Print

Tibetlerning sürgündiki rohaniy dahiysi dalay lama yéqinda özining tibetke qaytip bérish arzusini yene bir qétim ipadiligen.

Radi'oyimizning xewer qilishiche, tibetlerning sürgündiki rohaniy dahiysi dalay lama 17-noyabir küni tibet sürgündiki hökümiti jaylashqan darimsaladin ayrilip, hindistan paytexti yéngi déhli we hindistanning sherqini ziyaret qilish sepirini bashlighan. U yéngi déhlige atlinish aldida darimsaladiki ayrodromgha xitay kontrolluqidiki tibet rayonidin kelgen 40 nechche neper rahib dalay lama bilen körüshkili kelgen bolup, dalay lama ular bilen ayrim-ayrim sözleshken.

Mezkur tibetlikler dalay lamaning aldida yigha-zare qiliship, uning tibetke qaytishini telep qilishqanda dalay lama öziningmu tibetke qaytish arzusini bildürüp, "Eger peqet xitay hökümiti qoshulsila, men derhal tibetke qaytimen" dégen.

Dalay lama ilgirimu özining tibetke qaytish arzusini tekitligen bolup, u xitay hökümiti bilen söhbet ötküzüsh, tibet mesilisini söhbet yoli bilen hel qilishni izchil telep qilip, öz elchisini bir qanche qétim xitay terep bilen sözleshtürgen bolsimu, emma bu "Söhbetler" netije bermigen, xitay hökümiti bolsa dalay lamani izchil "Bölgünchilik" bilen eyiblep kelmekte. Chet'ellerdiki tibet pa'aliyetchiliri arisida dalay lamaning mundaq xitaygha tutqan yumshaq pozitsiyisi, yeni, "Ottura yol" siyasitidin waz kechmeslikige qarita naraziliq keypiyatiningmu janliniwatqanliqi éytilmaqta.

Dalay lama bu qétim yéngi déhli we hindistanning sherqidiki orisa, gherbiy bén'gal shtatlirida bir hepte ziyarette bolidiken hem nutuq sözleydiken, lékin hazirghiche xitay terepning dalay lamaning hindistandiki bu bir qatar pa'aliyetlirige qarita naraziliq inkasi bildürgen yaki bildürmigenliki heqqide uchur yoq, emma bu yil aprélda uning hindistandiki arunachal pradish shtatini ziyaret qilishigha qarita xitay qattiq naraziliq bildürgen bolsimu, hindistan terep qulaq salmighan idi. 

Dalay lamaning hindistandiki pa'aliyetliri hindistan-xitay arisidiki bir mezgil qattiq jiddiyleshken chégra majirasi peseygen bir peytke toghra keldi.

Toluq bet