Адвокатлар вә академикләр хитай һөкүмитиниң диний паалийәтләрни башқуруш низамиға наразилиқ билдүрди

Мухбиримиз әркин
2016-09-30
Елхәт
Пикир
Share
Принт

Хитайдики 20 дәк адвокат, академик вә диний зат хитай хәлқ қурултийиға хәт йезип, хитай дөләт кабинети елан қилған диний паалийәтләрни башқуруш низами диний әркинликниң техиму қаттиқ бастурулушиға йол ачидиғанлиқини агаһландурған.

Хитай дөләт кабинети бу айниң башлирида диний паалийәтләрни башқуруш чарисиниң пикир елиш лайиһәсини елан қилип, пикир елиш сүрики 7‏-өктәбир тошидиғанлиқини билдүргән. Мәзкур лайиһидә ғәйрий рәсими диний паалийәтлирини чәкләш, тибәт вә уйғур мусулманлириниң ичидики «бөлгүнчиләр»ни бастурушқа даир интайин конкрет тәдбирләр оттуриға қоюлған. Бу тәдбирләр мәктәп орунлирида ибадәт қилиш, диний паалийәтләрни өткүзүш, торда диний тәблиғ қилиш қатарлиқ мәзмунларни өз ичигә алған.

Униңда йәнә, шәхс вә гуруһларниң пуқраларни чәтәлдики диний курс, йиғин вә паалийәтләргә тәшкиллиши чәклинип, «һөкүмәт органлири бөлгүнчилик, террорлуқ вә чәтәл күчлириниң сиңип киришигә қарита һошяр турушқа чақирилған.»

Хитай христиан кишилик һоқуқ адвокатлиридин ли гуйшиң радиомизға бәргән баянатида, хитай дөләт кабинетиниң хитай асаси қанунидики әркинликкә чәк қоюш һоқуқи йоқлуқини, диний әркинлик асаси қанунида қоғдалғанлиқини тәкитлигән.

Җав фамилилик бир хитай протестант попиниң америкидики «хитай ярдәм җәмийити» намлиқ христиан тәшкилатиға билдүрүшичә, мәзкур лайиһидә йәрлик асаси қатлам һөкүмәт органлириға қәдәр зор һоқуқ берилгән. У, «бу лайиһә диний һаятни имкансиз әһвалға елип бариду» дегән.

Пикирләр (0)
Share
Толуқ бәт