Amérika dölet mejlisi ezaliri qanun layihesi sunup, xongkong aptonomiyesini soda bilen baghlashni telep qildi

Muxbirimiz erkin
2019-06-14
Élxet
Pikir
Share
Print

Xongkongda zor kölemlik naraziliq namayishlirining partlishi we da'irilerning namayishchilargha zorluq küch ishlitishidin kéyin amérika dölet mejlisi ezaliri qayta qanun layihesi sunup, xongkongda démokratiye, musteqil edliye we kishilik hoquqni qoghdashni telep qilghan.

Qanun layihesini amérikaning awam we kéngesh palatasidiki her ikki partiyedin bolghan ezaliri ortaq teyyarlighan bolup, uningda amérikaning xongkong bilen bolghan alahide soda munasiwitini uning siyasiy aptonomiye ehwaligha baghlash telep qilin'ghan.

Xongkong xelqi 9‏-iyun küni bir milyon kishilik namayish qilip, xongkong waliysining xitay chong quruqluqigha "Qachqunlarni ötküzüp bérish qanun layihesi" ge qarshi turghan.

Namayish 12‏-iyun küni toqunushqa aylan'ghan bolup, saqchilar namayishchilargha zorluq küch qollan'ghan.

"Dewr" heptilik zhurnilining xewiride bildürülishiche, xongkong kishilik hoquq-démokratiye qanun layiheside "Xongkongda erkinlik we aptonomiye yoqitishqa uchrawatqan bir waqitta amérika özining démokratiyelik kishilik hoquq we qanun bilen bashqurulushqa bolghan wedisini qayta tekitleydu" déyilgen. Mezkur qanun layihesi amérika dölet mejlisining her ikki palatasida "Uyghur kishilik hoquq siyasiti qanun layihesi" din kéyin otturigha qoyulghan xitayning démokratiye, kishilik hoquq mesilisige alaqidar eng muhim qanun layihesi bolup hésablinidu.

Amérika Uyghur kishilik hoquq qanun layihesi bu yil 1‏-ayda amérika awam we kéngesh palatalirida birla waqitta otturigha qoyulup, Uyghurlarni qoghdash telep qilin'ghanidi. "Dewr" zhurnilining bildürüshiche, xongkong démokratiye qanun layiheside her yili xongkongning aptonomiye ehwalini bahalap, buning, amérika bilen bolghan alahide soda munasiwitige layiq yaki layiq emeslikini qarar qilish telep qilin'ghan. Amérika awam palata ezasi jim mikgowérn bu heqte élan qilghan bayanatida, "Biz bu qanun layihesini otturigha qoyduq, chünki bügün xongkongda démokratiye we erkinlik hujumgha uchrimaqta" dégen.

Toluq bet