Dunya bankisi: "Xitayning shinjangdiki Uyghur mekteplirige bérilgen qerzni xata ishletkenlikige da'ir héchqandaq alamet bayqalmidi"

Muxbirimiz erkin
2019-08-30
Élxet
Pikir
Share
Print

Dunya bankisi 29‏-awghust küni yene bayanat élan qilip, Uyghur rayonidiki mekteplerge bérilgen qerz pulini qayta-tekshürüsh chiqqanliqi, lékin qerz pulning bashqa ishlargha ishlitilgenlikige da'ir héchqandaq bir alamet bayqalmighanliqini bildürgen. Yéqinda dunya bankisining 2015‏-yili Uyghur rayonidiki 5 mektepke "Kespiy terbiyilesh programmisi" namida 50 milyon dollar qerz bergenliki ashkarilan'ghan. Xitay hökümitining 2 milyondek Uyghur, qazaq qatarliqlarni "Kespiy terbiyilesh" namida lagérlargha solighanliqi ilgiri sürülüwatqan bir mezgilde dunya bankisining "Kespiy terbiyilesh programmisi" namida uninggha qerz bérishi amérika dölet mejlisi ezalirining we kishilik hoquq teshkilatlirining diqqitini qozghighan. Amérika dölet mejlisining ikki ezasi yéqinda dunya bankisining prézidénti deywid malpasqa mektup yézip, uning buninggha chüshenche bérishini telep qilghan.

Dunya bankisining bayanatchisi deywid de'is ötken hepte radiyomizgha bayanat élan qilip, Uyghur rayonidiki mekteplerge qerz bergenlikini aqlighanidi. Firansiye agéntliqining 30‏-awghust xewer qilishiche, dunya bankisi peyshenbe küni élan qilghanda bayanatida: "Dunya bankisi bu programmida mekteplerge bergen qerzning programma sirtidiki herqandaq bir meqsetke ishlitilgenlikige da'ir héchqandaq alamet bayqalmidi" dégen. Bayanatta qeyt qilinishiche, nöwette dunya bankisi yéqinda otturigha qoyulghan endishilerge asasen bir mutexessisler guruppisining bashchiliqida qoshumche tekshürüsh élip barmaqtiken. 

Bayanatta, tekshürüsh élip bériliwatqanliqi, eger héchqandaq xilapliq körülmise, programmining dawam qilidighanliqi bildürülgen. Lékin, bezi musteqil tetqiqatchilarning ilgiri sürüshiche, programmidiki mekteplerning lagérlar bilen alaqisi bolmighan teqdirdimu, bu mektepler hemkarliq élip bériwatqan yerlik téxnika mekteplirining lagérlar bilen alaqisi bar iken.

Toluq bet