Америка авам палата әзаси мусулман әллирини уйғурларниң бастурулушиға қарши чиқишқа чақирди

Мухбиримиз әркин
2018-12-28
Елхәт
Пикир
Share
Принт

Америка дөләт мәҗлиси хитай ишлар комитетиниң рәиси, авам палата әзаси кристофир симит 28‏-декабир күни «вашингтон почтиси» гезитидә мақалә елан қилип, хәлқарани хитайниң диний бастурушиға қарши турушқа, болупму мусулман дөләтлирини хитайниң уйғур мусулманлирини бастурушиға қарши турушқа чақирған.

Кристофир симит, сабиқ уйғур тутқуни меһригүл турсунниң америка дөләт мәҗлисидики гуваһлиқ йиғинида қилған сөзини нәқил кәлтүрүп, дуняниң буниңға көз юмушиға болмайдиғанлиқи, һәммә кишиниң дәс туруши вә бу дөләттики кишилик һоқуқ дәпсәндичиликигә қарши туруши керәкликини билдүргән.

У мақалисидә, хитайниң һәр қайси диний гуруһларни «хитайлаштуруш» қа киришкәнлики, буниң бир милйондин артуқ уйғур вә башқа мусулманларниң тутқун қилинип, тән җазасиға учраш, диний етиқадини әйибләшкә елип барғанлиқини билдүргән.

Униң илгири сүрүшичә, дунядики диний әркинликкә әһмийәт беридиған һәрқандақ дөләт америка вә явропа дөләтлиридәк хитайниң мусулман уйғурларға, христианларға, буддист тибәтләр вә фалунгоңчиларға тутқан муамилисини тәнқид қилиши керәк икән.

Кристофир симит, «биз хитайниң диний урушиға қарши дәс турушимиз керәк» намлиқ мақалисидә, мусулман дөләтлириниң уйғурларниң бастурулушиға көз юмуп кәлгәнликини тәнқидләп, бу дөләтләр «хитайниң бир йол бир бәлвағ ул әслиһәләр қурулушидин алидиған пайдисиға хәвп йәтсиму, бу хорлашқа наразилиқ билдүрүши керәк» дегән.

У йәнә өзиниң кеңәш палата әзаси марко рубио билән биллә президент трамп һөкүмитини йәршари магнитиский қанунини ишқа селип, хитай әмәлдарлирини җазалашқа чақирғанлиқи, техника експорт қилишқа чәклимә қоюшни тәләп қилғанлиқи, уйғур кишилик һоқуқ қанун лайиһәсини оттуриға қойғанлиқини билдүргән.

Униң илгири сүрүшичә, америка дөләтләргә йетәкчилик қилип, хитай коммунистик партийәсигә бир милйондин артуқ уйғурни қамап, уларниң диний, мәдәнийитини қорал билән йоқитиштәк бузғунчилиқ вә һаясизлиққа йол қоюлмайдиғанлиқини билдүрүп қоюши керәк икән.

Пикирләр (0)
Share
Толуқ бәт