Amérika awam palata ezasi musulman ellirini Uyghurlarning basturulushigha qarshi chiqishqa chaqirdi

Muxbirimiz erkin
2018-12-28
Élxet
Pikir
Share
Print

Amérika dölet mejlisi xitay ishlar komitétining re'isi, awam palata ezasi kristofir simit 28‏-dékabir küni "Washin'gton pochtisi" gézitide maqale élan qilip, xelq'arani xitayning diniy basturushigha qarshi turushqa, bolupmu musulman döletlirini xitayning Uyghur musulmanlirini basturushigha qarshi turushqa chaqirghan.

Kristofir simit, sabiq Uyghur tutquni méhrigül tursunning amérika dölet mejlisidiki guwahliq yighinida qilghan sözini neqil keltürüp, dunyaning buninggha köz yumushigha bolmaydighanliqi, hemme kishining des turushi we bu dölettiki kishilik hoquq depsendichilikige qarshi turushi kéreklikini bildürgen.

U maqaliside, xitayning her qaysi diniy guruhlarni "Xitaylashturush" qa kirishkenliki, buning bir milyondin artuq Uyghur we bashqa musulmanlarning tutqun qilinip, ten jazasigha uchrash, diniy étiqadini eyibleshke élip barghanliqini bildürgen.

Uning ilgiri sürüshiche, dunyadiki diniy erkinlikke ehmiyet béridighan herqandaq dölet amérika we yawropa döletliridek xitayning musulman Uyghurlargha, xristi'anlargha, buddist tibetler we falun'gongchilargha tutqan mu'amilisini tenqid qilishi kérek iken.

Kristofir simit, "Biz xitayning diniy urushigha qarshi des turushimiz kérek" namliq maqaliside, musulman döletlirining Uyghurlarning basturulushigha köz yumup kelgenlikini tenqidlep, bu döletler "Xitayning bir yol bir belwagh ul esliheler qurulushidin alidighan paydisigha xewp yetsimu, bu xorlashqa naraziliq bildürüshi kérek" dégen.

U yene özining kéngesh palata ezasi marko rubi'o bilen bille prézidént tramp hökümitini yershari magnitiskiy qanunini ishqa sélip, xitay emeldarlirini jazalashqa chaqirghanliqi, téxnika éksport qilishqa cheklime qoyushni telep qilghanliqi, Uyghur kishilik hoquq qanun layihesini otturigha qoyghanliqini bildürgen.

Uning ilgiri sürüshiche, amérika döletlerge yétekchilik qilip, xitay kommunistik partiyesige bir milyondin artuq Uyghurni qamap, ularning diniy, medeniyitini qoral bilen yoqitishtek buzghunchiliq we hayasizliqqa yol qoyulmaydighanliqini bildürüp qoyushi kérek iken.

Toluq bet