Хитай уйғур районидики електронлуқ тәқиб қилиш техникисини ичкири өлкиләргә кеңәйтишкә башлиған

Мухбиримиз әркин
2018-03-30
Елхәт
Пикир
Share
Принт

«Вашингтон почтиси» гезити җүмә күни мақалә елан қилип, хитайниң уйғур районида қолланған юқири техникилиқ тәқиб қилиш системисиниң пүтүн хитайға кеңәйтиливатқанлиқи, буниң хитай пуқралириниң шәхси мәхпийәтликигә җиддий хирис пәйда қиливатқанлиқини билдүрди.

Мақалида шенҗин шәһиридә пиядиләр йолидин өтүп кәткән бир хитай қизиға сақчиларниң җәриманә қоюш вәқәси мисал кәлтүрүлүп, хитайниң йүз тонуш аппарати вә башқа юқири техникилиқ вастилар арқилиқ кишиләрниң шәхси учури вә күндилик паалийитини қандақ контрол қиливатқанлиқи йорутуп берилгән. Мақалида бу техникиларниң әң аввал уйғур районидики «бөлгүнчилик» һәрикәтлирини бастурушта ишлитилгәнлики, һазир униң ичкири өлкиләргә кеңәйтилип, қатнаш қаидисигә хилаплиқ қилиш, аптомобилини хата орунға тохтитиш, юқири авазда сигнал бериш яки йолни кесип өткән пиядиләргә җәриманә қоюштәк һадисиләрдә ишлитиливатқанлиқи билдүрүлгән.

Мақалида йәнә хитай сақчилириниң уйғур районида сүзүклүк дәриҗиси интайин юқири камера, йүз тонуш техникиси, көз вә бәдән тәкшүрүш аппаратлири, д н а әвришкисини мәҗбурий топлаш, әқилфонларға омумий йүзлүк назарәт қилиш юмтали қачилаш қатарлиқ вастилар арқилиқ 21‏-әсирдики сақчи дөлитиниң техникилиқ ул әслиһәлирини қуруп чиққанлиқи, бу ул-әслиһәләрниң уйғурларни нишан қилғанлиқини билдүргән.

Мақалида көрситишичә, шенҗинлиқ хитай қизиниң вәқәси бу техникиниң пүтүн хитайға кеңийиватқанлиқи, лекин хитай һөкүмитиниң уни қатнаш қаидисидә ишлитиш биләнла чәклинип қалмайдиғанлиқини илгири сүргән. Мақалида «уларниң пилани кишиләрниң характерини кәң көләмлик өзгәртиш,» дейилгән.

Пикирләр (0)
Share
Толуқ бәт