Әнглийә парламенти авам палатасиниң әзаси дайән абот 15-ноябир тиветтерда учур йоллап, 14-ноябир хитайниң уйғурларға қирғинчилиқ йүргүзүватқанлиқи инкар қилинған бир тор йиғиниға қатнашқанлиқи үчүн әпу сориған. Униң тәкитлишичә, у бу йиғинға хитайниң вәһшийликини инкар қилғучиларниң қатнашқанлиқидин хәвири йоқ икән. Лекин әнглийәлик бәзи журналистлар униң бу йиғинға қатнишип, буни «қанунлаштурғанлиқи», шу сәвәбтин буниң җавабкарлиқни үстигә елиши керәкликини билдүргән.
Дайән абот 14-ноябир «ирқчилиққа вә йеңи соғуқ урушқа қарши бирлишиш» намлиқ бир тор йиғиниға қатнашқан. Йиғинда бәзи қатнашқучилар хитайниң милйонлиған уйғурни лагерларға қамап, омумйүзлүк бастуруватқанлиқини инкар қилған. Дайән абот 15-ноябир тиветтерда елан қилған учурида у вә униң ишчилар партийәси уйғур кишилик һоқуқиниң дәпсәндичиликкә учраватқанлиқини тәнқид қилидиғанлиқини билдүргән. У: «әгәр мениң шәнбә күнидики бу йиғинға қатнишишим пәрқлиқ сигнал бәргән болса, әпу сораймән,» дегән.
Униң тәкитлишичә, у өзиниң «хәлқара ирқчилиққа қарши туруш вә кишилик һоқуқни қоғдаш һәрикитини давамлаштуридикән.» Бирақ әнглийәли журналист оз катерҗи 15-ноябир мәҗид навазниң зияритини қобул қилғанда, дайән аботниң бурунму сербийә-боснийә уруши вә сүрийә мәсилисидә охшаш хаталиқ садир қилғанлиқини илгири сүргән. Униң тәкитлишичә, дайән абот «бу йиғинға қатнашқанлиқи үчүн әпу сорашниң орниға бундақ бир мунбәргә чиқип, уни қанунлаштурғанлиқи үчүн җавабкарлиқни үстигә елиши керәк,» икән.
