En'gliye parlamént ezasi dayen abot "Uyghur qirghinchiliqi" inkar qilin'ghan tor yighinigha qatnashqanliqi üchün epu soridi

Muxbirimiz erkin
2020-11-16
Élxet
Pikir
Share
Print

En'gliye parlaménti awam palatasining ezasi dayen abot 15-noyabir tiwéttérda uchur yollap, 14-noyabir xitayning Uyghurlargha qirghinchiliq yürgüzüwatqanliqi inkar qilin'ghan bir tor yighinigha qatnashqanliqi üchün epu sorighan. Uning tekitlishiche, u bu yighin'gha xitayning wehshiylikini inkar qilghuchilarning qatnashqanliqidin xewiri yoq iken. Lékin en'gliyelik bezi zhurnalistlar uning bu yighin'gha qatniship, buni "Qanunlashturghanliqi", shu sewebtin buning jawabkarliqni üstige élishi kéreklikini bildürgen.

Dayen abot 14-noyabir "Irqchiliqqa we yéngi soghuq urushqa qarshi birlishish" namliq bir tor yighinigha qatnashqan. Yighinda bezi qatnashquchilar xitayning milyonlighan Uyghurni lagérlargha qamap, omumyüzlük basturuwatqanliqini inkar qilghan. Dayen abot 15-noyabir tiwéttérda élan qilghan uchurida u we uning ishchilar partiyesi Uyghur kishilik hoquqining depsendichilikke uchrawatqanliqini tenqid qilidighanliqini bildürgen. U: "Eger méning shenbe künidiki bu yighin'gha qatnishishim perqliq signal bergen bolsa, epu soraymen," dégen.

Uning tekitlishiche, u özining "Xelq'ara irqchiliqqa qarshi turush we kishilik hoquqni qoghdash herikitini dawamlashturidiken." biraq en'gliyeli zhurnalist oz katérji 15-noyabir mejid nawazning ziyaritini qobul qilghanda, dayen abotning burunmu sérbiye-bosniye urushi we süriye mesiliside oxshash xataliq sadir qilghanliqini ilgiri sürgen. Uning tekitlishiche, dayen abot "Bu yighin'gha qatnashqanliqi üchün epu sorashning ornigha bundaq bir munberge chiqip, uni qanunlashturghanliqi üchün jawabkarliqni üstige élishi kérek," iken.

Toluq bet