«Сиясий чолпан» әнвәр турсун тәкшүрүшкә елип кетилди

Мухбиримиз әзиз
2019-07-30
Елхәт
Пикир
Share
Принт

Уйғур дияридики һакимийәт системисида сани анчә көп болмиған уйғур әмәлдарларниң бири бир қисим кишиләр кәлгүсидә техиму юқири мәнсәп пәштиқиға чиқиду дегән қарашта «сиясий чолпан» дәп атайдиған әнвәр турсун һесаблиниду. Йеқинғичә уйғур аптоном районлуқ хәлқ қурултийиниң муавин баш катипи болуп ишләватқан әнвәр турсунниң буниңдин мәлум вақит илгири «тәкшүрүш» кә елип кетилгәнлики 30-июл күни елан қилинди.

«Хитай хәвәр тори», «бейҗиң тез гезити» қатарлиқ көплигән хитай ахбаратлирида көрситилишичә, әнвәр турсун хизмәт җәрянида «еғир дәриҗидә интизамға хилаплиқ қилған» лиқи үчүн тәптиш орунлириниң тәкшүрүшигә елип кетилгән.

Хәвәрдә ейтилишичә, 1966-йили 5-айда хотәндә туғулған әнвәр турсун 1982-йилидин 1987-йилиғичә «шинҗаң малийә-иқтисад институти» да оқуған. Оқуш пүттүргәндин кейин қәшқәр вилайитиниң малийә системисида хизмәт қилған. 2001-Йилидин тартип қәшқәр шәһириниң муавин шәһәр башлиқи, йеңишәһәр наһийәсиниң һакими, қәшқәр вилайәтлик парткомниң муавин секретари вә қәшқәрниң шәһәр башлиқи қатарлиқ хизмәтләрдә болған. 2017-Йили ш у а р хәлқ қурултийиниң муавин баш катиплиқиға өстүрүлгән.

Мәлум болушичә, хитай һөкүмитиниң бу хил «тәкшүрүш» кә елип кетиш һәрикити адәттә юқири дәриҗилик кадирларға берилидиған җазаниң биринчи қәдими болуп, «тәкшүрүш» тин кейин сот мәһкимиси қамаққа һөкүм қилидикән. Сабиқ рәис нур бәкриму әйни вақитта қәшқәрниң муавин валиси болуп ишлигән һәмдә 2018-йили мушу хилдики «тәкшүрүш» кә елип кетилгән иди.

Пикирләр (0)
Share
Толуқ бәт