Америка хәлқара диний әркинлик комитети уйғур елидики назарәт системисиға четишлиқ болған хәйкаң шеркитини тәнқид қилди

Мухбиримиз ирадә
2020-05-21
Елхәт
Пикир
Share
Принт

Америка хәлқара диний әркинлик комитети (USCIRF) хитайниң хәйкаң шеркитини (Hikvision) «еғир диний әркинлик дәпсәндичиликигә четишлиқ» дәп тәнқид қилди.

Америка хәлқара диний әркинлик комитети (USCIRF) йеқинда баянат елан қилип, америка һөкүмитиниң хитайдики пай чеки базириға селинип оборот қилиниватқан федератсийә пенсийә записини қайтуруп келиш қарарини қарши алған.

Америка һөкүмитиниң бу қарарни чиқиришидики асаслиқ сәвәб юқириқи бу пенсийә мәбләғлириниң васитилик һалда хитай армийәсини һәрбий айропиланлар билән тәмин етидиған «хитай авиатсийә санаити гуруһи» вә назарәт механизимида авангартлиқ ролини ойнаватқан хәйкаң» рәқәмлик технологийә ширкити» гә охшаш ширкәтләрни иқтисадий йөләккә игә қилип қоюши иди.

Америка хәлқара диний әркинлик комитетиниң комиссари тензин дорҗи баянатта йәр алған сөзидә бу қарарниң интайин тоғра болғанлиқини шәрһләп: «хитай һөкүмити илғар камера системиси арқилиқ аз санлиқ милләтләрни назарәт қилиду. Улар бу камералар арқилиқ уйғур мусулманлири, тибәт буддистлири вә башқа диний гуруппиларни назарәт қилди,» дегән.

Америка хәлқара диний әркинлик комитетиниң комиссари гари бавер болса баянатта «америка федератсийә хизмәтчилири өзлири ишләп тапқан пенсийә пулиниң хитайдики диний әркинлик бесимиға янтаяқ болмайдиғанлиқи һәққидә капаләткә игә қилиниши керәк,» дегән. У: «биз һәргизму пайда үчүн қиммәт қаришимизни қурбан қилмаслиқимиз керәк,» дәп әскәрткән.

Хәлқара диний әркинлик комитети 2020-йиллиқ йиллиқ диний әркинлик доклатида америка һөкүмитини «йәр шари магнетский кишилик һоқуқ қануни» вә хәлқара диний әркинлик қанунлирини ишқа селиш арқилиқ уйғур елидики дини әркинликниң дәпсәндә қилинишиға мәсул болуватқан уйғур райониниң партком секретари чен чүәнго қатарлиқ хитай әмәлдарлирини җазалашни тәләп қилған иди.

Пикирләр (0)
Share
Толуқ бәт