«Әркинликкә тутушидиған қараңғу йол» намлиқ китаб нәшр қилинди

Мухбиримиз қутлан
2017-08-27
Елхәт
Пикир
Share
Принт

Түркийәдики оттура асия мутәхәссиси әнвәр алтайли язған «әркинликкә тутушидиған қараңғу йол» намлиқ китаб инглизчиға тәрҗимә қилинип, йеқинда әнглийәдә нәшр қилинди.

Мәзкур китаб алди билән түркийәдә түркчә нәшр қилинған болуп, униңда өктәбир инқилабиниң һарписида мәрғиланда туғулуп өскән рози нәзәрниң қандақ қилип совет қизил армийисидә әскәр болғанлиқи, иккинчи дуня урушиға қатнишип герман әскәрлиригә әсиргә чүшкәнлики, уруш йиллирида натсистлар германийәси тәшкил қилған түркистан девизийисидә офитсер болғанлиқи, уруштин кейин америка армийисигә тәслим болғанлиқи вә кейинки һаятида американиң мәркизий ахбарат идарисидә ишләп пенсийигә чиққанлиқидәк мурәккәп вәқәләр баян қилинған.

Қизиқарлиқи шуки, мәзкур китабта рози нәзәрниң соғуқ уруш мәзгилидики мәхпий паалийәтлиригә даир нурғун мәлуматлар берилгән. Болупму униң американиң дипломатийә хадими сүпитидә соғуқ уруш йиллирида сабиқ ғәрбий германийәниң пайтәхти бон вә түркийәниң пайтәхти әнқәрәдә елип барған мәхпий паалийәтлири, 1979-йилидики иран ислам инқилаби мәзгилидә теһранда гөрүгә тутулған америка дипломатлирини қутқузуш оператсийәсидә ойниған роли һәққидә баянлар берилгән.

Китабта йәнә 1955-йили һиндонезийәниң бандоң шәһиридә ечилған «асия-африқа йиғини» да рози нәзәрниң оттуриға чиқип хитай баш министири җо енләйни қаттиқ мат қилғанлиқи, хитай коммунистлириниң уйғурлар вәтини билән тибәтни бесивалған қизил мустәмликичи икәнлики һәққидә йиғин әһлигә сөз қилғанлиқи тоғрилиқму мәлуматлар берилгән.

Нөвәттә бу китаб «амазон» тори арқилиқ сетиливатқан болуп, оттура асияниң 20-әсирдики тарихий өзгиришлиригә қизиққучиларниң диққәт-етибарини қозғимақтикән.

Толуқ бәт