Уйғур аптоном районниң әсәбийликни түгитиш низами хәлқара мәтбуатларда кәң хәвәр қилинди

Мухбиримиз ирадә
2017-03-30
Елхәт
Пикир
Share
Принт

Чаршәнбә күни, уйғур аптоном район даирилири 50 маддилиқ аптоном районниң «әсәбийликни түгитиш низами» ни рәсмий қарардин өткүзгәнликини җакарлиғандин кейин, бу хәвәр хәлқара мәтбуатлардиму күчлүк инкас қозғап, кәң хәвәр қилинди.

Бу һәқтики хәвәрләр ройтерс агентлиқи, б б с хәвәр тори, яху хәвәрлири, австралийәниң хәлқаралиқ телевизийиси а б с қанили, әнглийәниң мустәқил гезити вә шуниңдәк пакистан, һиндистан вә кенийә қатарлиқ дөләтләрниң торлиридиму кәң хәвәр қилинди.

Бу һәқтә мустәқил гезитидә берилгән тәпсилий хәвәрдә, юқиридики «әсәбийликни түгитиш низами»дики алақидар маддиларға асасән әгәр бир киши дөләт телевизийә қанилини көрүшни халимисиму җинайәт қатариға киридиғанлиқи алаһидә тилға елинди. Хәвәрләрдә, хитай һөкүмити уйғур елидә йүргүзүватқан қаттиқ қоллуқ сиясәтләрни йүргүзүватқанлиқи, бу сәвәблик зораванлиқ вәқәлириниң көпәйгәнлики, уйғур елидә бурқа кийидиғанларниңму кейинки йилларда көрүнәрлик артқанлиқи, әмма нурғун көзәткүчиләрниң буни, хитай һөкүмитиниң сиясәтлиригә қарши бир инкас сүпитидә оттуриға чиққан, дәп қарайдиғанлиқи баян қилинған.

Уйғур елиниң вәзийитини йеқиндин көзитип келиватқан бир қисим чәтәллик тәтқиқатчилар, тивиттер торидики инкаслирида, әсәбйликни түгитиш низамини хитай һөкүмитиниң уйғур елидики диний вә пикир қилиш әркинликигә қиливатқан бастурушини қанунийлаштурушқа урунуш, дәп атиди. Йәнә бир инкаста «әмди хитай һөкүмитиниң әсәбийликини сүрүштүридиған вақит кәлди» дәп йезилди.

Пикирләр (0)
Share
Толуқ бәт