Уйғур аптоном райони әсәбийликкә қарши турушқа аит бир йеңи қануний низамни бекитти

Мухбиримиз үмидвар
2017-03-29
Елхәт
Пикир
Share
Принт

«Тәңритағ тори» ниң хәвиридин ашкарилинишичә, 29-март күни уйғур аптоном районлуқ 12-қетимлиқ хәлқ қурултийи даимий һәйәт әзалириниң 28-қетимлиқ йиғинида 43 даимий һәйәт әзаниң авази бериши билән 50 маддилиқ «аптоном районниң әсәбийликни түгитиш низами» қарардин өткүзүлгән.

Йиғинға риясәтчилик қилған хәлқ қурултийи мудири нәйим ясин мәзкур низамға баһа берип, «мәзкур низам әсәбийликниң чеграсини рошән бекитип бәрди, әсәбийликниң алдини қандақ елиш, уни қандақ чәкләш вә қандақ йоқитиш қатарлиқларни көрситип бәрди» дегән.

Мәзкур 50 маддилиқ низамда әсәбийликниң ипадиси сүпитидә 15 тармақ нуқтилар тәпсилий көрситилгән болуп, булар қатариға: «башқиларниң диний етиқад әркинликигә арилишиш, башқиларни диний паалийәтләргә қатнишишқа зорлаш, радио, телевизийә қатарлиқларни чәткә қеқиш, йемәкликләрниң һалаллиқ уқумини кеңәйтиш, пәрзәнтлириниң дөләт маарипи тәрбийәси елишиға йол қоймаслиқ» вә башқа көп хил мәзмунлар киргән.

Мәзкур низамда йәнә һөкүмәтниң мунасивәтлик органлири вә җәмийәтниң һәр қайси тәрәплириниң әсәбийликни түгитиш мәсулийәтлири конкрет бекитилгән.

Бу мунасивәт билән дуня уйғур қурултийиниң баянатчиси дилшат ришит инкас қайтуруп, мәзкур йеңи низамниң уйғурларниң диний әркинлики, сөз- мәтбуат әркинлики қатарлиқларни өз ичигә алған кишилик һоқуқ әркинлики қатарлиқ әқәллий инсан һәқлирини техиму дәхли-тәрзгә учритидиғанлиқини вә буниң уйғурларни әсәбийлик һәм террорлуқ қалпиқи кийдүрүп җазалашни қанунлаштурушқа урунуш икәнликини билдүрди.

Мәзкур низам 4-айниң 1-күнидин етибарән уйғур райони даирисидә рәсмий йолға қоюлидикән.

Пикирләр (0)
Share
Толуқ бәт