Хитай қәшқәр вә хотәндики 10 миңдин артуқ әмгәк күчини дөләт карханилириға орунлаштурулғанлиқини илгири сүрмәктә

Мухбиримиз қутлан
2017-09-04
Елхәт
Пикир
Share
Принт

Қурбан һейтниң 3-күни хитай таратқулири «деһқан-чарвичидин һазирқи заман ишчилиқиғичә: қәшқәр, хотәндики 10 миңдин артуқ ешинча әмгәк күчи дөләт карханилириниң ишчилириға айланди» намлиқ мақалини улап басқан.

«Шинҗаң гезити» тәһрирати бу һәқтә мәхсус илавә йезип, буниң хитай компартийәсиниң 19-қурултийи ечилиш һарписида уйғур аптоном районидики деһқан-чарвичиларға көрситилгән әмәлий нәп икәнликини алаһидә әскәртип өткән.

Мақалидә дейилишичә, бу йил 8-айниң 23-күнигә қәдәр, даириләр қәшқәр вә хотән вилайәтлиридин йөткигән 10 миң 680 нәпәр ешинча әмгәк күчини шималдики 16 дөләт карханиси билән мәркәзниң уйғур аптоном районида турушлуқ 26 карханисиға ишқа орунлаштуруп болған икән.

Бу зор түркүмдики уйғур ишчилар нөвәттә өзлири орунлашқан дөләт карханилирида «партийәниң ғәмхорлуқиға миннәтдарлиқ билдүрүш, хитай тили вә қанун-түзүм өгиниш, һәрбий мәшиқ қилиш, ‹үчни сөйүш, үчкә қарши туруш' вә бихәтәр ишләпчиқириш билимлирини өгиниш» ишлири билән мәшғул болмақтикән.

Хәвәрдә тәкитлинишичә, улар дәсләпки тәрбийә басқучида айда 2 миң йүәндин, рәсмий иш башлиғандин кейин айда 3 миң йүәндин мааш алидикән.

Хитай таратқулири нөвәттә уйғур аптоном районидики дөләт карханилирида ишләватқан йәрлик милләт ишчилириниң миллий нисбитиниң илгирики 25 пирсәнттин өрләп 35 пирсәнткә йәткәнликини илгири сүрмәктә.

Һалбуки, көзәткүчиләр, даириләрниң нөвәттә хитай өлкилиридин уйғур елиға тәклип қиливатқан хитай сақчилар билән аталмиш «дөләт тили» оқутқучилириниң айлиқ маашиниң райондики уйғур ишчилириниң иш һәққини 3 қатлайдиғанлиқини тәкитлимәктә.

Пикирләр (0)
Share
Толуқ бәт