Xitay qeshqer we xotendiki 10 mingdin artuq emgek küchini dölet karxanilirigha orunlashturulghanliqini ilgiri sürmekte

Muxbirimiz qutlan
2017-09-04
Élxet
Pikir
Share
Print

Qurban héytning 3-küni xitay taratquliri "Déhqan-charwichidin hazirqi zaman ishchiliqighiche: qeshqer, xotendiki 10 mingdin artuq éshincha emgek küchi dölet karxanilirining ishchilirigha aylandi" namliq maqalini ulap basqan.

"Shinjang géziti" tehrirati bu heqte mexsus ilawe yézip, buning xitay kompartiyesining 19-qurultiyi échilish harpisida Uyghur aptonom rayonidiki déhqan-charwichilargha körsitilgen emeliy nep ikenlikini alahide eskertip ötken.

Maqalide déyilishiche, bu yil 8-ayning 23-künige qeder, da'iriler qeshqer we xoten wilayetliridin yötkigen 10 ming 680 neper éshincha emgek küchini shimaldiki 16 dölet karxanisi bilen merkezning Uyghur aptonom rayonida turushluq 26 karxanisigha ishqa orunlashturup bolghan iken.

Bu zor türkümdiki Uyghur ishchilar nöwette özliri orunlashqan dölet karxanilirida "Partiyening ghemxorluqigha minnetdarliq bildürüsh, xitay tili we qanun-tüzüm öginish, herbiy meshiq qilish, 'üchni söyüsh, üchke qarshi turush' we bixeter ishlepchiqirish bilimlirini öginish" ishliri bilen meshghul bolmaqtiken.

Xewerde tekitlinishiche, ular deslepki terbiye basquchida ayda 2 ming yüendin, resmiy ish bashlighandin kéyin ayda 3 ming yüendin ma'ash alidiken.

Xitay taratquliri nöwette Uyghur aptonom rayonidiki dölet karxanilirida ishlewatqan yerlik millet ishchilirining milliy nisbitining ilgiriki 25 pirsenttin örlep 35 pirsentke yetkenlikini ilgiri sürmekte.

Halbuki, közetküchiler, da'irilerning nöwette xitay ölkiliridin Uyghur éligha teklip qiliwatqan xitay saqchilar bilen atalmish "Dölet tili" oqutquchilirining ayliq ma'ashining rayondiki Uyghur ishchilirining ish heqqini 3 qatlaydighanliqini tekitlimekte.

Toluq bet