Хитай даирилири уйғур әмгәк күчлириниң йөткәш нуқтисини аилә аяллириға қаратқан

Мухбиримиз әркин
2018-12-28
Елхәт
Пикир
Share
Принт

Хитай даирилири уйғур йезилиридики аталмиш ешинча әмгәк күчлирини йөткәп орунлаштуруш даирисини кеңәйтип, уйғур аилә аяллириға қаратқан.

Даириләр йеқинда хотәнниң қарақаш наһийәсидин бир түркүм уйғур аилә аяллирини ичкири өлкиләргә йөткигән. Йәрлик ахбарат васитилириниң хәвәр қилишичә, хитайниң пилани қарақаш наһийәсидин 1199 нәпәр аилә аялини түркүмләргә бөлүп, хитайниң фуҗйән, хунән, хубей өлкилиридә тамақ етиш, тамақхана мулазимити қатарлиқ кәсипләрдә тәрбийәләш икән.

Мәзкур пилан 24‏-декабирдин башлап рәсмий йолға қоюлған. Шу күни хотән пойиз истансисида мурасим өткүзүлүп, тунҗи түркүмдики уйғур аилә аяллири хитайниң ичкири өлкилиригә йолға селинған. Лекин хәвәрдә, ичкиригә йолланған аилә аяллириниң аилә әһвали, бала-чақилириниң бар-йоқлуқи, бала чақилиқ болса улардин кимниң хәвәр алидиғанлиқи қатарлиқ тәпсилатларға һечқандақ чүшәнчә берилмигән.

Хитай һөкүмити бурун намратлиқтин қутқузуш намида яш уйғур йеза әмгәк күчлирини кәң көләмлик ичкири өлкиләргә йөткәп кәлгән. Лекин бу униң тунҗи қетим аилә аяллирини түркүмләп ичкиригә өлкиләргә йөткишидур.

Уйғур кишилик һоқуқ тәшкилатлириниң илгири сүрүшичә, хитайниң уйғур аилә аяллирини түркүмләп ичкири өлкиләргә йөткиши, уйғур аилилириниң пүтүнлүкигә бузғунчилиқ қилип, униң техиму еғир вәйранчилиққа учришини кәлтүрүп чиқидикән. Хитай һөкүмити илгири нурғун ата-аниларниң йиғивелиш лагерлириға қамап, балиларниң игисиз қелиши, аилиләрниң вәйран болушини кәлтүрүп чиқарған.

Д у қ ниң илгири сүрүшичә, нөвәттә 2 милйондин 3 милйонғичә уйғур вә башқилар йиғивелиш лагерлирида тутуп турулмақта икән. Хитайниң уйғур әмгәк күчлирини йөткиши уйғур тәшкилатлириниң тәнқидигә учрап кәлгән болсиму, лекин хитай һөкүмити бу тәнқидләргә қулақ салмай кәлди.

«Тәңритағ» ториниң 26‏-декабир хәвәр қилишичә, уйғур аптоном районлуқ партком 2019‏-йили 2 милйон 700 миң адәм қетим йөткәш ишқа орунлаштурушни оттуриға қойған.

Пикирләр (0)
Share
Толуқ бәт