Xitay da'iriliri Uyghur emgek küchlirining yötkesh nuqtisini a'ile ayallirigha qaratqan

Muxbirimiz erkin
2018-12-28
Élxet
Pikir
Share
Print

Xitay da'iriliri Uyghur yéziliridiki atalmish éshincha emgek küchlirini yötkep orunlashturush da'irisini kéngeytip, Uyghur a'ile ayallirigha qaratqan.

Da'iriler yéqinda xotenning qaraqash nahiyesidin bir türküm Uyghur a'ile ayallirini ichkiri ölkilerge yötkigen. Yerlik axbarat wasitilirining xewer qilishiche, xitayning pilani qaraqash nahiyesidin 1199 neper a'ile ayalini türkümlerge bölüp, xitayning fujyen, xunen, xubéy ölkiliride tamaq étish, tamaqxana mulazimiti qatarliq kesiplerde terbiyelesh iken.

Mezkur pilan 24‏-dékabirdin bashlap resmiy yolgha qoyulghan. Shu küni xoten poyiz istansisida murasim ötküzülüp, tunji türkümdiki Uyghur a'ile ayalliri xitayning ichkiri ölkilirige yolgha sélin'ghan. Lékin xewerde, ichkirige yollan'ghan a'ile ayallirining a'ile ehwali, bala-chaqilirining bar-yoqluqi, bala chaqiliq bolsa ulardin kimning xewer alidighanliqi qatarliq tepsilatlargha héchqandaq chüshenche bérilmigen.

Xitay hökümiti burun namratliqtin qutquzush namida yash Uyghur yéza emgek küchlirini keng kölemlik ichkiri ölkilerge yötkep kelgen. Lékin bu uning tunji qétim a'ile ayallirini türkümlep ichkirige ölkilerge yötkishidur.

Uyghur kishilik hoquq teshkilatlirining ilgiri sürüshiche, xitayning Uyghur a'ile ayallirini türkümlep ichkiri ölkilerge yötkishi, Uyghur a'ililirining pütünlükige buzghunchiliq qilip, uning téximu éghir weyranchiliqqa uchrishini keltürüp chiqidiken. Xitay hökümiti ilgiri nurghun ata-anilarning yighiwélish lagérlirigha qamap, balilarning igisiz qélishi, a'ililerning weyran bolushini keltürüp chiqarghan.

D u q ning ilgiri sürüshiche, nöwette 2 milyondin 3 milyon'ghiche Uyghur we bashqilar yighiwélish lagérlirida tutup turulmaqta iken. Xitayning Uyghur emgek küchlirini yötkishi Uyghur teshkilatlirining tenqidige uchrap kelgen bolsimu, lékin xitay hökümiti bu tenqidlerge qulaq salmay keldi.

"Tengritagh" torining 26‏-dékabir xewer qilishiche, Uyghur aptonom rayonluq partkom 2019‏-yili 2 milyon 700 ming adem qétim yötkesh ishqa orunlashturushni otturigha qoyghan.

Toluq bet