Хитай өлкилиридики карханилар уйғур елидин «ешинча әмгәк күчлирини» қобул қилса һөкүмәтниң алаһидә ярдимидин бәһримән болидикән

Мухбиримиз ирадә
2016-02-26
Елхәт
Пикир
Share
Принт

Хитай өлкилиридики карханилар уйғур елидин ишчи-хизмәтчиләрни қобул қилса сиясий җәһәттики толуқлимидин бәһримән болидикән.

Хәлқ ториниң бу һәқтә бәргән хәвиридин мәлум болушичә, хитай һөкүмити уйғур елидики аталмиш «ешинча әмгәк күчлирини хитай өлкилиригә йөткәш» сияситини толуқ әмәлийләштүрүш үчүн, хитай өлкилиридики, шәһәрләрдики карханилар әгәр уйғур елидин һөкүмәтниң тәшкиллиши билән кәлгән ишчиларни қобул қилса уларға йилда аз дегәндә 300 миң сом толуқлима берип, алаһидә сиясәттин бәһримән қилишни қарар қилған.

Юқиридики бу ярдәмгә еришиш үчүн карханилар чоқум һөкүмәт уйғур елидин тәшкилләп киргүзгән ишләмчиләрдин аз дегәндә 30 нәпирини қобул қилиши һәмдә улар билән бир йилдин юқири әмгәк тохтами имзалиши керәк икән.

Уйғур аптоном район даирилири йеқинда «13-бәш йил» мәзгилидә йезилардики артуқ әмгәк күчлиридин хитай өлкилиригә йөткәп ишқа орунлаштурушни 11 милйон адәм қетимға йәткүзидиғанлиқини җакарлиған иди.

Чәтәлләрдики уйғур сиясий көзәткүчилири хитай һөкүмитиниң шунчә чоң мәбләғ аҗритип йезилардики ишсиз уйғур яшлирини хитай өлкилиригә ишқа орунлаштурушни давамлаштуруши буниң хитай һөкүмитиниң узақ мәзгиллик истратегийилик пилани икәнликини ашкарилап беридиғанлиқини билдүрмәктә.

Хәлқ ториниң хәвиридин қариғанда йәнә, юқиридики сиясәт билән биргә, хитай һөкүмити йәнә аз санлиқ милләт аммисиниң хитай өлкилиригә кирип тиҗарәт билән шуғуллинишиға илһам бериш үчүн, өлкә, шәһәрлиридики адәмләр бир қәдәр мәркәзлик олтурақлашқан районларда завут өйи, яйма орни һәққи қатарлиқ җәһәтләрдә етибар беридикән, ишқа орунлишиш вә турмуш җәһәтләрдә қолайлиқ шараит яритип беридикән.

Пикирләр (0)
Share
Толуқ бәт