Қазақистан мәтбуатида әхмәтҗан қасими қатарлиқларниң қазасиниң 68 йиллиқи хатириләнди

Мухбиримиз үмидвар
2017-09-03
Елхәт
Пикир
Share
Принт

Қазақистан уйғур мәтбуатида 1944-1949-йиллардики миллий азадлиқ инқилаб рәһбәрлиридин әхмәтҗан қасими қатарлиқларниң қазасиниң 68 йиллиқи мунасивити билән мақалә елан қилинди.

Қазақистанда чиқидиған «уйғур авази» гезитиниң йеңи санида 1949-йили, 27-авғуст күни ,1944-1949-йиллиридики миллий азадлиқ инқилаб рәһбәрлиридин әхмәтҗан қасими, исақбәг муноноф қатарлиқларниң айропилан қазасиға учраш мәсилиси һәққидә бир парчә мақалә елан қилинған болуп, мақалә аптори журналист ядигар сабитоф өз мақалисини йезишта йеқинда русийәдә елан қилинған әхмәтҗан қасими қатарлиқларниң өлүми һәққидики бир қисим мақалә -учурларни асас қилған.

Ядигар сабитоф русийәниң бурятийә җумһурийитиниң интернет торида елан қилинған русийә журналисти ботаҗап раднайевниң «шәрқий түркистан җумһурийити рәһбәрлириниң бурятидә һалак болуши» мавзулуқ мақалисидики учурлар асасида әхмәтҗан қасими қатарлиқлар олтурған айропиланниң бурятийә җумһурийити тәвәсидики кабан теғиға чүшүп кәткәнликини әслитип өткән.

Тарихи учурлардин мәлум болушичә, хитай һөкүмәт мәтбуатлири әхмәтҗан қасими қатарлиқ 8 кишиниң бейҗиңда ечилидиған мәмликәтлик сиясий кеңәш йиғиниға қатнишиш үчүн йолға чиқип, 1949-йили, 27-авғуст күни байқал көли бойидики иркутскй шәһиригә йеқин җайда айропилан қазасиға учрап һаятидин айрилғанлиқини рәсмийләштүргән иди. Һазирғичә әхмәтҗан қасими қатарлиқларниң иркутскй, чита қатарлиқ җайларда айропилан һадисисигә учриғанлиқи ейтилған, бирақ, русийәдә елан қилинған бир қисим йеңи интернет мақалә-учурлирида көрситилишичә, әхмәтҗан қасими қатарлиқлар, байқал көли бойидики бурятийә җумһурийитиниң кабан теғида қазаға учриған. ядигар сабитоф мақалисини мәзкур учурлар шуниңдәк сәйпидин әзизниң әслимисидики учурлар билән селиштуруп йезип чиққан.

Вәһаләнки, аптор һазирғичә әхмәтҗан қасими қатарлиқларниң қазасиниң орни вә уларниң өлүми һәққидә һәр хил қарашлар давамлишип келингәнликини қәйт қилған.

Тарихи учурлардин мәлум болушичә, әхмәтҗан қатарлиқлар җәсәтлири 1950-йили, февралда мав билән сталин совет-хитай достлуқ келишимини түзүп болғандин кейин, совет иттипақидин ғулҗиға елип келинип, дәпнә қилинған иди.

Пикирләр (0)
Share
Толуқ бәт