Үрүмчи шәһәрлик тәптиш мәһкимиси «һалаллиқ чүшәнчисини кеңәйтиветиш»кә җәң елан қилди

Мухбиримиз әзиз
2018-10-09
Елхәт
Пикир
Share
Принт

Үндидарда кәң тарқалған учурлардин мәлум болушичә, 8-өктәбир күни үрүмчи шәһәрлик тәптиш мәһкимиси «‹һалаллиқни кеңәйтиветиш'кә қарши қәтий күрәш қилиш» чоң йиғини ачқан.

Йиғинда пүткүл шәһәрдики тәптиш системисида ишләватқан уйғур кадирларниң идеологийә саһәсидики күрәш еңини өстүрүши һәмдә идийәсини азад қилип «һалаллиқни кеңәйтиветиш»кә қарши қәтий күрәш қилиши оттуриға қоюлған.

Хәвәрдә ейтилишичә, шәһәрлик тәптиш мәһкимиси партийә гурупписиниң секретари лю миң йиғин иштиракчилирини «қәтий маркисизимчи-ленинизимчилардин болуш», «һечқандақ динға етиқад қилмаслиқ», «җени чиқип кәтсиму байриқи рошән һалда ‹һалаллиқни кеңәйтиш'кә қарши туруш» һәққидә қәсәм қилишқа тәшкиллигән. Шәһәрлик тәптиш мәһкимисиниң баш тәптиши илшат осман нөвәттә кәң тәшвиқ қилиниватқан «достум, мән үчүн һалал ресторан издәп аварә болмаң!» сәрләвһилик очуқ хәткә имза қойған һәмдә тәптиш системисидики кадирларни «пан түркизм» вә «пан исламизм» идийәлириниң зийинини чоңқур тонуп йетишни тәләп қилған.

Йиғин ахирида буниңдин кейин тәптиш системисидики барлиқ ишчи-хизмәтчиләрниң бирдәк қәтий атиизимчилардин болидиғанлиқи, һечқандақ диний етиқадта болмайдиғанлиқи, һәрқандақ җайда хитай тилида сөзләйдиғанлиқи, йемәк-ичмәктә һалал-һарам чүшәнчисини тилға алмайдиғанлиқи оттуриға қоюлған.

Мәлум болушичә, «һалаллиқ чүшәнчисини кеңәйтиветишкә қарши туруш» күриши дәсләп мәһсулатлардики «һалал» дегән хәтни йоқитиштин башланған болуп, нөвәттә «һалал» дегән уқумни тәкитләшму мәни қилинмақта икән.

Пикирләр (0)
Share
Толуқ бәт