Хитайниң уйғурлар диярида хәлқара һәрбий мусабиқә өткүзүши диққәт қозғиди

Мухбиримиз әзиз
2017-07-25
Елхәт
Пикир
Share
Принт

Хитай мәркизий һөкүмити җиддий иҗра қиливатқан «бир бәлвағ бир йол» қурулушиниң кеңийишигә әгишип, хитай армийисиниң алақидар дөләтләр билән болған һәрбий мунасивәтни күчәйтишкә башлиғанлиқи мәлум.

Хитайниң «йәр шари вақит гезити» ниң бүгүнки хәвиридә тәпсилий мәлумат берилгән хитайниң бирнәччә дөләт билән бирлишип, уйғурлар диярида һәрбий маневир өткүзмәкчи болғанлиқи шуларниң бири, дәп қаралмақта.

Хәвәрдә ейтилишичә, хитай һазир деңиз армийисини күчәйтиш билән биргә, мудапиә вә бихәтәрлик дегән намда «шаңхәй һәмкарлиқ тәшкилати» дики әза дөләтләр билән биргә «террорлуққа қарши туруш» мәшиқини давамлаштуридикән. Буниң бир қисми сүпитидә 29-июлдин 12-авғустқичә хитай билән русийә бирликтә «2017-йиллиқ хәлқара һәрбий мусабиқә» гә саһибханилиқ қилидикән. Буниң үчүн тәйярланған русийә армийисиниң танка вә броневик қатарлиқ һәрбий әшялири өткән һәптила корлиға йөткәп келинишкә башлиған.

Русийәниң рәсмий хәвәр агентлиқи болған т а с с ниң мәлуматлирида ейтилишичә, бу қетимқи хәлқара һәрбий мусабиқиниң бир қисми сүпитидә русийә, беларусийә, иран вә мисир командилири уйғурлар дияриға келип «бихәтәр муһит» темиси бойичә мусабиқилишидикән. Хитай һөкүмитиниң тәлипи бойичә, дин саһәсидә оқуватқан уйғур оқуғучиларни қолға алған мисир һөкүмитиниң һеч күтүлмигәндә бу қетим уйғурлар диярида өткүзүлмәкчи болған хәлқара һәрбий мусабиқигә иштирак қилиши көплигән кишиләрни һәйран қалдуруватқанлиқи мәлум.

Уйғурлар дияридики вәзийәтни йеқиндин көзитип келиватқанлар, бу қетимқи хәлқара һәрбий мусабиқиниң уйғурлар районида өткүзүлүши һәққидә тохтилип «бу, хитай һөкүмитиниң уйғурларни қорқутуш, шундақла қошниси һиндистан билән болған чегра сүркилиши түпәйлидин һиндистанға һәйвә көрситишни мәқсәт қилған болуши мумкин» дейишмәктә.

Пикирләр (0)
Share
Толуқ бәт