Xitayning Uyghurlar diyarida xelq'ara herbiy musabiqe ötküzüshi diqqet qozghidi

Muxbirimiz eziz
2017-07-25
Élxet
Pikir
Share
Print

Xitay merkiziy hökümiti jiddiy ijra qiliwatqan "Bir belwagh bir yol" qurulushining kéngiyishige egiship, xitay armiyisining alaqidar döletler bilen bolghan herbiy munasiwetni kücheytishke bashlighanliqi melum.

Xitayning "Yer shari waqit géziti" ning bügünki xewiride tepsiliy melumat bérilgen xitayning birnechche dölet bilen birliship, Uyghurlar diyarida herbiy manéwir ötküzmekchi bolghanliqi shularning biri, dep qaralmaqta.

Xewerde éytilishiche, xitay hazir déngiz armiyisini kücheytish bilen birge, mudapi'e we bixeterlik dégen namda "Shangxey hemkarliq teshkilati" diki eza döletler bilen birge "Térrorluqqa qarshi turush" meshiqini dawamlashturidiken. Buning bir qismi süpitide 29-iyuldin 12-awghustqiche xitay bilen rusiye birlikte "2017-Yilliq xelq'ara herbiy musabiqe" ge sahibxaniliq qilidiken. Buning üchün teyyarlan'ghan rusiye armiyisining tanka we bronéwik qatarliq herbiy eshyaliri ötken heptila korligha yötkep kélinishke bashlighan.

Rusiyening resmiy xewer agéntliqi bolghan t a s s ning melumatlirida éytilishiche, bu qétimqi xelq'ara herbiy musabiqining bir qismi süpitide rusiye, bélarusiye, iran we misir komandiliri Uyghurlar diyarigha kélip "Bixeter muhit" témisi boyiche musabiqilishidiken. Xitay hökümitining telipi boyiche, din saheside oquwatqan Uyghur oqughuchilarni qolgha alghan misir hökümitining héch kütülmigende bu qétim Uyghurlar diyarida ötküzülmekchi bolghan xelq'ara herbiy musabiqige ishtirak qilishi köpligen kishilerni heyran qalduruwatqanliqi melum.

Uyghurlar diyaridiki weziyetni yéqindin közitip kéliwatqanlar, bu qétimqi xelq'ara herbiy musabiqining Uyghurlar rayonida ötküzülüshi heqqide toxtilip "Bu, xitay hökümitining Uyghurlarni qorqutush, shundaqla qoshnisi hindistan bilen bolghan chégra sürkilishi tüpeylidin hindistan'gha heywe körsitishni meqset qilghan bolushi mumkin" déyishmekte.

Toluq bet