Xitay-hindistan qoshunlirining ladax rayonidiki toqunushi diqqet qozghimaqta

Muxbirimiz eziz
2020-05-20
Élxet
Pikir
Share
Print

Hindistan bilen xitay otturisida 1962-yili chégra toqunushi sewebidin bir qétimliq qanliq urush yüz bergen bolup, shu waqitta xitay azadliq armiyesining terkibidiki Uyghur eskerlerning bu urushqa "Top yémi" qilip sélin'ghanliqi hélihem köp qisim Uyghurlargha tonushluq hékayidur.

Del mushu tarixiy toqunush körülgen jayda yéqindin buyan ikki terep otturisida ewj éliwatqan herbiy sürkilish barghanséri zor diqqet qozghashqa bashlidi.

"Iqtisad waqti" gézitinnng 19-maydiki xewiride éytilishiche, bu qétimqi sürkilish asasliqi ladax rayonidiki galwan jilghisida körülgen bolup, bu jay Uyghur diyari bilen tutushidiken. Ötken heptide ikki terep herbiyliri mushu etrapta jangjalliship qalghan bolup, hindistan axbaratliri bu weqeni "Xitayning 1962-yilidiki öktemlikini qaytidin namayan qilghanliq" dep tenqidligen.

Eyni waqittiki chégra urushida xitay terep bilen hindistan bir-birini "Tajawuzchi" dep eyibligen bolup, bu qétimmu xitay hökümiti hindistan qoshunlirini "Xitay chégrasidin qanunsizliq bilen ötti" dep eyibligen. Emma hindistan hökümiti buninggha qarita "Bu xil ikki yüzlimichilik bilen tolghan bayanatlargha biz perwa qilmaymiz. Chünki tajawuzchiliqni kimning qiliwatqanliqi bekmu ashkara bolmaqta," dégen. Emma her ikki terep özlirining bu rayondiki chégra mudapi'e qisimlirining sanini tézdin ashurghan.

Xitayning hökümet taratqusi bolghan "Yer shari waqti géziti" bu munasiwet bilen maqale élan qilip: "Biz bu qétimqi sürkilishni yene bir qétimliq 'doklam chégra toqunushi' gha seweb bolidu, dep qarimaymiz" dégen.

Toluq bet