Xongkongda tunji qétim bir ayal memuriy rayon bashliqliqigha saylandi

Muxbirimiz ümidwar
2017-03-26
Élxet
Pikir
Share
Print

26-Mart küni xongkongda ötküzülgen xongkong alahide memuriy rayon bashliqini saylashta xongkong tarixida tunji qétim bir ayal siyasiyon ghelibe qilip, xongkongning aliy rehbirilik ornigha érishti.

En'gliye b b s agéntliqining xewer qilishiche, lin jéngyö é, yeni kerri lam xanim (Carrie Lam) 1186 kishilik saylam komitéti ezasining bélet tashlishi arqiliq 777 béletke ériship, riqabetchilirini yéngip xongkong alahide memuriyitining bashliqigha saylan'ghan.

Emma, kerri lamning ghelibisi naraziliq bildürüshlergimu duch kelgen bolup, bir top kishiler saylam netijisige naraziliq bildürüp, xongkongning saylam tüzümini özgertishni telep qilghan. Kerri lamni qollimaydighanlar uning saylamda utup chiqishining béyjingning qollishi bilen bolghanliqi, saylam komitétidiki 1200 kishining köpchilikining béyjing terepdarliri ikenlikini bildürüshken.

Kerri lam saylamdin kéyin sözligen sözide siyasiy islahat mesilisini tilgha almighan. Emma muxbirlarning bu heqtiki so'allirigha jawab bergende xongkongda hel qilishqa tégishlik bir qatar mesililer barliqini, bu ishni keynige qoyghanliqi, emma éniq waqtigha kapaletlik qilalmaydighanliqini bildürgen.

Kerri lam 1957-yili, xongkongda tughulghan bolup, xongkong uniwérsitétni püttürgendin kéyin xongkong hökümet orunlirida ishligen. U, 2012-yili béyjing hökümiti teripidin xongkong memuriyitining edliye bashliqliqigha teyinlinip, xongkongdiki 2-nomurluq hoquqdar shexske aylan'ghan idi.

Toluq bet