Америка хитайни хоңкоңлуқларниң әркинликигә һөрмәт қилишқа чақирди

Мухбиримиз сада
2019-08-14
Елхәт
Пикир
Share
Принт

Хоңкоңдики намайишчи амминиң хоңкоң айродроминиң күтүш залини игиливелиш вәқәсидин кейин, америка һөкүмити хитайни хоңкоңлуқларниң әркинликигә һөрмәт қилишқа чақирған.

Америкадики CBS ториниң 14-авғусттики хәвиригә қариғанда, хоңкоң айродроми намайишчилар қошуни тәрипидин егиливелинғандин кейин, хитай хәлқ азадлиқ армийиси шенҗен шәһиридә «маневир еһтияҗи» дегән намда топланған. Америка президенти доналд трамп 13-авғуст бу һәқтә твиттерға учур йоллап, «һәммәйлән салмақ вә бихәтәр болуши керәк,» дәп язған. 

Америка ташқи ишлар министирлиқиниң баянатчиси 13-авғуст кәчтә баянат елан қилип, хитайни 1990-йиллири хоңкоңни әнглийәниң қолидин қайтурувалғанда хоңкоңға бәргән вәдисидә чиң турушқа дәвәт қилған. 

Мәзкур баянатта йәнә бейҗиң даирилириниң хоңкоңни изчил «юқири дәриҗидики аптономийә һоқуқиға игә» дәп қарап кәлгәнлики тилға елиниш билән биргә шу йәрлик һөкүмәт даирилирини «дипломатик келишимләрдә бекитилгән пикир әркинлики вә топлишиш әркинликигә һөрмәт қилиши лазимлиқи» хитаб қилинған. 

Америка ташқи ишлар министирлиқиниң баянатчиси хоңкоң һәққидә қилған сөзлиридә нуқтилиқ қилип, «биз зораванлиқни қаттиқ әйибләймиз һәмдә иккила тәрәпни өзини тутувелишқа чақиримиз. Һалбуки, хоңкоңниң пикир вә топлишиш әркинликиниң һөрмәт қилиниши сақлинип турулуши керәк. Бу әркинликләр чоқум қаттиқ қоғдилиши керәк,» дегән. 

Намайишчилар қошуни билән сақчилар оттурисида йүз бәргән зораванлиқ тоқунушидин кейин хоңкоң хәлқаралиқ айродроминиң вәзийити 14-авғустқа кәлгәндә пәскойға чүшкән.

Пикирләр (0)
Share
Толуқ бәт