Amérika xitayni xongkongluqlarning erkinlikige hörmet qilishqa chaqirdi

Muxbirimiz sada
2019-08-14
Élxet
Pikir
Share
Print

Xongkongdiki namayishchi ammining xongkong ayrodromining kütüsh zalini igiliwélish weqesidin kéyin, amérika hökümiti xitayni xongkongluqlarning erkinlikige hörmet qilishqa chaqirghan.

Amérikadiki CBS torining 14-awghusttiki xewirige qarighanda, xongkong ayrodromi namayishchilar qoshuni teripidin égiliwélin'ghandin kéyin, xitay xelq azadliq armiyisi shénjén shehiride "Manéwir éhtiyaji" dégen namda toplan'ghan. Amérika prézidénti donald tramp 13-awghust bu heqte twittérgha uchur yollap, "Hemmeylen salmaq we bixeter bolushi kérek," dep yazghan. 

Amérika tashqi ishlar ministirliqining bayanatchisi 13-awghust kechte bayanat élan qilip, xitayni 1990-yilliri xongkongni en'gliyening qolidin qayturuwalghanda xongkonggha bergen wediside ching turushqa dewet qilghan. 

Mezkur bayanatta yene béyjing da'irilirining xongkongni izchil "Yuqiri derijidiki aptonomiye hoquqigha ige" dep qarap kelgenliki tilgha élinish bilen birge shu yerlik hökümet da'irilirini "Diplomatik kélishimlerde békitilgen pikir erkinliki we toplishish erkinlikige hörmet qilishi lazimliqi" xitab qilin'ghan. 

Amérika tashqi ishlar ministirliqining bayanatchisi xongkong heqqide qilghan sözliride nuqtiliq qilip, "Biz zorawanliqni qattiq eyibleymiz hemde ikkila terepni özini tutuwélishqa chaqirimiz. Halbuki, xongkongning pikir we toplishish erkinlikining hörmet qilinishi saqlinip turulushi kérek. Bu erkinlikler choqum qattiq qoghdilishi kérek," dégen. 

Namayishchilar qoshuni bilen saqchilar otturisida yüz bergen zorawanliq toqunushidin kéyin xongkong xelq'araliq ayrodromining weziyiti 14-awghustqa kelgende peskoygha chüshken.

Toluq bet