Хоңкоңда мустәбитликкә қарши вә 4 - июнни хатириләш намайиши өткүзүлди

Мухбиримиз үмидвар
2016-05-29
Елхәт
Пикир
Share
Принт


Хоңкоң вәтәнпәрвәр демократик һәрикитини қоллаш иттипақи дәп аталған бирләшмә тәшкилатниң уюштуруши билән 29 - май күни хоңкоң шәһиридә 1989 - йилидики 4 - июн вәқәсини әсләш вә бейҗиң мәркизи һөкүмитидин бу вәқәни ақлашни тәләп қилиш намайиши өткүзди.

Радиомиз гуаңдоң бөлүминиң хәвәр қилишичә, намайишчилар коча айлинип, намайиш қилғандин кейин ахири хитай мәркизи һөкүмитиниң хоңкоң алаһидә мәмурий районида турушлуқ алақә оргини алдиға келип тохтап, бейҗиң мәркизи һөкүмитигә өзлириниң тйәнәнмен оқуғучилар һәрикитини ақлаш тәләплирини сунған.

Намайишчиларниң бу йилқи асаслиқ чақириқи «4 - июн вәқәсини ақлап, назарәт вә қолға елишни тохтитиш, мустәбитликкә хатимә бериш» дегәнләрдин ибарәттур.

Намайиш тәшкиллигүчиләр тәхминән 1500 дин артуқ адәмниң намайишқа қатнашқанлиқини ейтқан болсиму, әмма сақчи тәрәп намайишчилар әң көпәйгәндә 780 адәмгә йәткәнликини һесаблиған.

Лекин, хоңкоң вәтәнпәрвәр демократик һәрикитини қоллаш иттипақи тәшкиллигән бу йиллиқ«тйәнәнмен вәқәсини ақлашни тәләп қилиш намайишиға оқуғучилар бирләшмиси тунҗи қетим қатнашмиғанлиқи үчүн адәм сани аз болуп қалған икән.

4 - Июн тйәнәнмен вәқәсиниң 27 йиллиқини хатириләш паалийәтлири чәтәлләрдики хитай демократик тәшкилатлири тәрипидин һәр хил шәкилдә хатирилиниватқанлиқи мәлум.

Пикирләр (0)
Share
Толуқ бәт