Xongkongda mustebitlikke qarshi we 4 - iyunni xatirilesh namayishi ötküzüldi

Muxbirimiz ümidwar
2016-05-29
Élxet
Pikir
Share
Print


Xongkong wetenperwer démokratik herikitini qollash ittipaqi dep atalghan birleshme teshkilatning uyushturushi bilen 29 - may küni xongkong shehiride 1989 - yilidiki 4 - iyun weqesini eslesh we béyjing merkizi hökümitidin bu weqeni aqlashni telep qilish namayishi ötküzdi.

Radi'omiz gu'angdong bölümining xewer qilishiche, namayishchilar kocha aylinip, namayish qilghandin kéyin axiri xitay merkizi hökümitining xongkong alahide memuriy rayonida turushluq alaqe orgini aldigha kélip toxtap, béyjing merkizi hökümitige özlirining tyen'enmén oqughuchilar herikitini aqlash teleplirini sun'ghan.

Namayishchilarning bu yilqi asasliq chaqiriqi "4 - Iyun weqesini aqlap, nazaret we qolgha élishni toxtitish, mustebitlikke xatime bérish" dégenlerdin ibarettur.

Namayish teshkilligüchiler texminen 1500 din artuq ademning namayishqa qatnashqanliqini éytqan bolsimu, emma saqchi terep namayishchilar eng köpeygende 780 ademge yetkenlikini hésablighan.

Lékin, xongkong wetenperwer démokratik herikitini qollash ittipaqi teshkilligen bu yilliq"Tyen'enmén weqesini aqlashni telep qilish namayishigha oqughuchilar birleshmisi tunji qétim qatnashmighanliqi üchün adem sani az bolup qalghan iken.

4 - Iyun tyen'enmén weqesining 27 yilliqini xatirilesh pa'aliyetliri chet'ellerdiki xitay démokratik teshkilatliri teripidin her xil shekilde xatiriliniwatqanliqi melum.

Toluq bet