Хәлқарадики нәшриятчилар хоңкоң даирилирини хитайға елип кетилгән 5 нәпәр китабпуруш мәсилисидә тәнқид қилди

Мухбиримиз ирадә
2016-02-18
Елхәт
Пикир
Share
Принт

Дуняниң һәрқайси җайлиридики нәшриятчилар бирликтә чақириқ елан қилип, хоңкоң даирилирини хитайда тутуп турулуватқан 5 нәпәр хоңкоңлуқ китабпурушниң из - дерикини қилишқа чақирди. Һазир хитай сақчи даирилири тәрипидин тәкшүрүш астиға елинған бу 5 нәпәр хоңкоңлуқ китабпурушниң һәммиси хитай компартийә рәһбәрлириниң әпти - бәширисини ачидиған китабларни нәшр қилиш вә тарқитиш билән тонулғанлар иди.

Фирансийә агентлиқиниң хәвәр қилишичә, америка вә явропадики нәшриятчилар бирлики, китабпурушлар вә адвокатлиқ җәмийәтлири бирлишип хоңкоң валийси ляң җенйиңға хәт язған. Хәткә имза қойғанлар ичидә америка «пән» қәләмкәшләр җәмийити, америка нәшриятчилар бирлики вә явропа нәшриятчилар бирләшмиси қатарлиқ органларму бар.

Бу органлар 17 - феврал күни хоңкоң валийсиға язған хетидә мундақ дегән: «бу вәқә хоңкоңдики язғучиларға, нәшриятчи вә китабпурушларға сиясий сәзгүрлүккә игә мәсилиләргә тегишсә ахири берип өзиниң әркинлики вә бихәтәрликиниң тәһдиткә учрайдиғанлиқидәк вәһимилик сигнални бәрди. Әпсуски бу әһвал, хоңкоңда пикир әркинликиниң пәйдинпәй йоқилишқа қарап йүз тутқанлиқини ипадиләп турмақта. Хоңкоң даирилири барлиқ күчини ишқа селип бу кишиләрниң қоюветилишини тәләп қилиши керәк.»

Хоңкоңлуқ китабпурушларниң вәқәсигә алдинқи һәптә америка, әнглийә вә явропа иттипақиму инкас қайтурған иди.

Әнглийә ташқи ишлар вәзири филип хаммонд баянатида бу бәшәйләнниң «мәҗбурий һалда» хитайға елип кетилгәнликини билдүргән вә буни «хоңкоң хитайға қайтуруп берилгәндә икки дөләт арисида имзаланған келишимләргә хилап һәрикәт» дәп көрсәткән иди. Бирақ, хитай һөкүмити хаммондниң сөзлирини «асассиз» дәп рәт қилған.

Пикирләр (0)
Share
Толуқ бәт