Xelq'aradiki neshriyatchilar xongkong da'irilirini xitaygha élip kétilgen 5 neper kitabpurush mesiliside tenqid qildi

Muxbirimiz irade
2016-02-18
Élxet
Pikir
Share
Print

Dunyaning herqaysi jayliridiki neshriyatchilar birlikte chaqiriq élan qilip, xongkong da'irilirini xitayda tutup turuluwatqan 5 neper xongkongluq kitabpurushning iz - dérikini qilishqa chaqirdi. Hazir xitay saqchi da'iriliri teripidin tekshürüsh astigha élin'ghan bu 5 neper xongkongluq kitabpurushning hemmisi xitay kompartiye rehberlirining epti - beshirisini achidighan kitablarni neshr qilish we tarqitish bilen tonulghanlar idi.

Firansiye agéntliqining xewer qilishiche, amérika we yawropadiki neshriyatchilar birliki, kitabpurushlar we adwokatliq jem'iyetliri birliship xongkong waliysi lyang jényinggha xet yazghan. Xetke imza qoyghanlar ichide amérika "Pen" qelemkeshler jemiyiti, amérika neshriyatchilar birliki we yawropa neshriyatchilar birleshmisi qatarliq organlarmu bar.

Bu organlar 17 - féwral küni xongkong waliysigha yazghan xétide mundaq dégen: "Bu weqe xongkongdiki yazghuchilargha, neshriyatchi we kitabpurushlargha siyasiy sezgürlükke ige mesililerge tégishse axiri bérip özining erkinliki we bixeterlikining tehditke uchraydighanliqidek wehimilik signalni berdi. Epsuski bu ehwal, xongkongda pikir erkinlikining peydinpey yoqilishqa qarap yüz tutqanliqini ipadilep turmaqta. Xongkong da'iriliri barliq küchini ishqa sélip bu kishilerning qoyuwétilishini telep qilishi kérek."

Xongkongluq kitabpurushlarning weqesige aldinqi hepte amérika, en'gliye we yawropa ittipaqimu inkas qayturghan idi.

En'gliye tashqi ishlar weziri filip xammond bayanatida bu besheylenning "Mejburiy halda" xitaygha élip kétilgenlikini bildürgen we buni "Xongkong xitaygha qayturup bérilgende ikki dölet arisida imzalan'ghan kélishimlerge xilap heriket" dep körsetken idi. Biraq, xitay hökümiti xammondning sözlirini "Asassiz" dep ret qilghan.

Toluq bet