Хоңкуңдики пуқралар билән сақчилар тоқунушида 124 адәм ярилинип, 61 адәм тутқун қилинди

Мухбиримиз меһрибан
2016-02-09
Елхәт
Пикир
Share
Принт


Хитайниң чаған байримида йәни 8 - феврал кечидин 9 - февралғичә хоңкуң җюлуң районида сақчилар билән пуқралар оттурисида тоқунуш йүз берип, 124 адәм ярилинип, 61 адәм сақчилар тәрипидин тутқун қилинди. Хәлқара таратқуларда бу вәқә, 2014 - йили хоңкуңда йүз бәргән күнлүк инқилабидин буянқи әң чоң тоқунуш дәп тәрипләнди.

Мәлум болушичә, хоңкуң даирилириниң кочилардики рухсәтнамиси йоқ яймикәшкәшләрни тазилаш һәрикитигә болған наразилиқ вәқәниң йүз беришигә сәвәб болған. 8 - Феврал күни хоңкоңдики йәрлик тәшкилатлар торда уқтуруш чиқирип, аммини даириләрниң чәклимисигә наразилиқ билдүрүшкә чақирған. Чаған кечиси яймичиларни тазилашқа кәлгән базар башқуруш хадимлири билән яймичилар арисида сүркүлүш йүз бәргәндин кейин, һөкүмәт хадимлириниң бу һәрикитигә наразилиқ билдүргән намайишчиларму җидәлгә арилашқан.8 - Феврал кечиси башланған җидәл 9 - февал сәһәрдә сақчилар билән амма оттурисидики тоқунушқа айланған. Намайишчилар сақчиларға хиш, кесәкләрни атқан, нурғун җайларға от қоювәткән. Сақчилар яш аққузуш бомбиси вә калтәк ишләткән. Бир сақчиниң асманға оқ чиқириши билән тоқунуш техиму күчийип сәһәргичә давамлашқан. Тоқунуш сәвәбидин нурғун аптобуслар линийәлирини өзгәртишкә мәҗбур болған.

Хоңкоңниң хитайға майил баш мәмури ляң җенйиң сәйшәнбә әттигән ечилған мухбирларни күтивелиш йиғинида бу вәқәни «алдин пиланланған зораванлиқ вәқәси» дәп атиған.

Пикирләр (0)
Share
Толуқ бәт