Америка дөләт мәҗлис әзалири илһам тохтини нобел мукапатиға намзат көрсәтти

Мухбиримиз ирадә
2019-01-30
Елхәт
Пикир
Share
Принт

Хитай һөкүмити тәрипидин муддәтсиз қамақ җазасиға һөкүм қилинған уйғур зиялийси илһам тохти америка дөләт мәҗлиси әзалири тәрипидин нобел тинчлиқ мукапатиға намзат қилип көрситилди.

29-январ күни, америка дөләт мәҗлисидики марко рубио, киристофир симит, ричард блументал, корий гарднер қатарлиқ җәмий 13 нәпәр авам вә кеңәш палата әзаси нобел тинчлиқ мукапати комитетиға имзалиқ мәктуп йоллиған.

Улар комитет рәисигә йоллиған имзалиқ мәктупида уйғур зиялийси илһам тохтиниң «уйғур хәлқиниң кишилик һоқуқини қоғдаш үчүн хитай һөкүмитини өзи бәлгилигән қанунларға әмәл қилишқа чақирған вә хитайдики милләтләр ара чүшинишни илгири сүрүш үчүн тинчлиқ билән паалийәт елип барған болсиму, әмма хитай һөкүмитиниң уни наһәқ йәргә өмүрлүк қамақ җазасиға һөкүм қилғанлиқи» ни баян қилған.

2017-Йилидин бери уйғур елидики вәзийәтниң йәниму еғирлашқанлиқи, хитай һөкүмитиниң бир милйондин артуқ уйғурни лагерларға қамаватқан мушундақ бир шараитта, уйғурларниң илһам тохтиға охшаш авазларға йәниму зор еһтияҗлиқ икәнлики әскәртилгән бу мәктупта илһам тохтиниң нобел тинчлиқ мукапатиға әң лайиқ бир намзат икәнлики тәкитләнгән.

Чәтәлләрдики уйғур көзәткүчиләрниң қаришичә, илһам тохтиниң юқиридикидәк америка сиясәт саһәсидә тәсиргә игә шәхсләр тәрипидин намзатлиққа көрситилишиниң әһмийити зор икән.

Техи бир күн аввал йәни 28-январ күни, ғәрб әллиридики бирқанчә тәшкилат баянат елан қилип, илһам тохтини 2019‏-йиллиқ норвегийә «рафто кишилик һоқуқ мукапати» ға намзатлиққа көрсәткәнликини җакарлиған иди.

Пикирләр (0)
Share
Толуқ бәт