Мәһбус уйғур зиялийси илһам тохти мартен әннал мукапатиниң 2016-йиллиқ талланған намзатлар қатариға кирди

Мухбиримиз шөһрәт һошур
2016-04-27
Елхәт
Пикир
Share
Принт

Җәнвәдики мартен әннал фонди тәрипидин берилидиған мартен аннал кишилик һоқуқ мукапатиниң 2016-йиллиқ талланған намзатлири бүгүн йәни чаршәнбә күни елан қилинди, түрмидики уйғур зиялийси илһам тохти талланған намзатлар қатаридин орун алди. Фирансийә ахбарат агентлиқиниң бүгүнки бу һәқтики хәвиридә баян қилинишичә мәзкур мукапатқа талланған намзатлар үч нәпәр болуп, булар илһам тохтидин башқа йәнә сүрийәлик ғайиб өктичи разан зәйтунә вә «зон-9 » намлиқ ефиопийәлик бир кишилик һоқуқ блог гурупписи икән.

Хәвәрдин мәлум болушичә, илһам тохти хитай территорийәсидә туруп хитайниң уйғур сияситини ашкара тәнқид қилалаштәк һәққанийәтчилики вә җасарити үчүн талланған намзатлар қатариға лайиқ көрүлгән. Разан зәйтунә сүрийәдә әсәд реҗимиға қарши паалийәттә болуватқан чеғида из-дерәксиз ғайиб болған; ефиопийәлик блогчилар болса дөлитидики қанунсиз тутқун қилиш һәрикәтлирини паш қилиш билән шуғулланғанлиқи үчүн һөкүмәт даирилири тәрипидин тутқун қилинған вә террорлуқ билән әйибләнгән.

Мартен әннал әслидә хәлқара кәчүрүм тәшкилатиниң тунҗи баш катипиниң нами болуп, бу намдики кишилик һоқуқ мукапати 1993-йили тәсис қилинған. Мукапат намзатлириниң лаяқити дуня кишилик һоқуқни көзитиш тәшкилати қатарлиқ 9 хәлқаралиқ тәшкилат тәрипидин баһалап чиқилиду.

Пикирләр (0)
Share
Толуқ бәт