Илһам тохти тунҗи қетим аилиси билән көрүшти

Мухбиримиз әркин
2015-06-19
Елхәт
Пикир
Share
Принт

Хитай һөкүмити түрмидики атақлиқ уйғур зиялийси илһам тохтиниң аилиси билән көрүшүшигә йол қойған. Илһам тохтиниң бурунқи адвокати лю шавйүәнниң радиомизға ашкарилишичә, 16‏-июн күни, илһам тохтиниң 2 акиси, иниси вә аниси үрүмчи 1‏-түрмигә берип униң билән көрүшкән.

Бу, хитай даилириниң 2014‏-йили 9-айда илһам тохтини «дөләтни парчилашқа урунуш» билән әйибләп муддәтсиз қамаққа һөкүм қилғандин буян, униң аилиси билән көрүшүшигә тунҗи қетим йол қоюшидур.

Лекин көрүшүшкә илһам тохтиниң бейҗиңдики аяли вә оғли келәлмигән. Лю шавйүәнниң илгири сүрүшичә, көрүшүш вақти илһамниң оғлиниң имтиһан вақтиға тоғра келип қалғачқа улар 7‏-айда оғли тәтилгә чиққанда келип көрүшидикән.

Адвокат лю шавйүәнниң билдүрүшичә, илһам тохтиниң чоң акиси телефонда көрүшүшниң бир саәттин артуғрақ давам қилғанлиқини, илһамниң роһий вә җисманий әһвали яман әмәс турғандәк қилғанлиқини сөзләп бәргән.

Хитай даирилириниң илһам тохтиға тутқан муамилиси кишилик һоқуқ тәшкилатлириниң қаттиқ тәнқидигә учрап кәлгән иди. Бейҗиңда турушлуқ кишилик һоқуқ паалийәтчиси ху җя җүмә күни радиомизға қилған сөзидә үрүмчи даирилирини тәнқидләп, «шинҗаңниң гав җишең, илһам тохти қатарлиқ сиясий мәһбусларға тутқан муамилиси қанун-түзүмгә пүтүнләй хилап» дегән.

Илһам тохти 2014‏-йили 1‏-айда қолға елинип, шу йили 9‏-айда сотланған. Үрүмчи шәһәрлик оттура сот униңға муддәтсиз қамақ җазасиға һөкүм қилип, америка, явропа иттипақи вә хәлқара кишилик һоқуқ тәшкилатлириниң қаттиқ наразилиқиға учриған иди.

Пикирләр (0)
Share
Толуқ бәт