Ilham toxti tunji qétim a'ilisi bilen körüshti

Muxbirimiz erkin
2015-06-19
Élxet
Pikir
Share
Print

Xitay hökümiti türmidiki ataqliq Uyghur ziyaliysi ilham toxtining a'ilisi bilen körüshüshige yol qoyghan. Ilham toxtining burunqi adwokati lyu shawyüenning radi'omizgha ashkarilishiche, 16‏-iyun küni, ilham toxtining 2 akisi, inisi we anisi ürümchi 1‏-türmige bérip uning bilen körüshken.

Bu, xitay da'ilirining 2014‏-yili 9-ayda ilham toxtini "Döletni parchilashqa urunush" bilen eyiblep muddetsiz qamaqqa höküm qilghandin buyan, uning a'ilisi bilen körüshüshige tunji qétim yol qoyushidur.

Lékin körüshüshke ilham toxtining béyjingdiki ayali we oghli kélelmigen. Lyu shawyüenning ilgiri sürüshiche, körüshüsh waqti ilhamning oghlining imtihan waqtigha toghra kélip qalghachqa ular 7‏-ayda oghli tetilge chiqqanda kélip körüshidiken.

Adwokat lyu shawyüenning bildürüshiche, ilham toxtining chong akisi téléfonda körüshüshning bir sa'ettin artughraq dawam qilghanliqini, ilhamning rohiy we jismaniy ehwali yaman emes turghandek qilghanliqini sözlep bergen.

Xitay da'irilirining ilham toxtigha tutqan mu'amilisi kishilik hoquq teshkilatlirining qattiq tenqidige uchrap kelgen idi. Béyjingda turushluq kishilik hoquq pa'aliyetchisi xu jya jüme küni radi'omizgha qilghan sözide ürümchi da'irilirini tenqidlep, "Shinjangning gaw jishéng, ilham toxti qatarliq siyasiy mehbuslargha tutqan mu'amilisi qanun-tüzümge pütünley xilap" dégen.

Ilham toxti 2014‏-yili 1‏-ayda qolgha élinip, shu yili 9‏-ayda sotlan'ghan. Ürümchi sheherlik ottura sot uninggha muddetsiz qamaq jazasigha höküm qilip, amérika, yawropa ittipaqi we xelq'ara kishilik hoquq teshkilatlirining qattiq naraziliqigha uchrighan idi.

Toluq bet