Хитай или дәрясиға селиватқан 3-чоң көврүкни пүттүрүш алдида

Мухбиримиз үмидвар
2017-07-02
Елхәт
Пикир
Share
Принт

Хитай даирилири или дәрясиға селиватқан 3-чоң көврүкни тез пүттүрмәкчи. Хитай ахбарат васитилиридин мәлум болушичә, или дәрясиниң 3-пәвқуладдә чоң көврүки дәп аталған мәзкур көврүк или дәрясиниң тармақ еқини болған күнәс дәрясиға селиниватқан болуп, буниң пәвқуладдә чоң көврүк дейилишидики сәвәб көврүкниң омуми узунлуқи вә кәңликигә қаритилған.

Тәңри тағ торидики хәвәрдә илгири сүрилишичә, мәзкур пәвқуладдә чоң көврүкниң узунлуқи 1117 метир, кәңлики 24 метир келидикән. Бу көврүк или дәрясидики биваситә ғулҗиға баридиған чоң көврүктин 816 метир узун икән. Мәзкур үчинчи көврүк бу йил 9-айда пүттүрүлидиған болуп, бу қурулуш үчүн 90 милйон сом аҗритилған.

Исмини ашкарилашни халимайдиған бир уйғур зиялисиниң ейтишичә, или дәрясиға селинған бу көврүкләр вә уйғур районидики қатнаш әслиһәлириниң раваҗландурулуши или вадиси қатарлиқ җайлар билән башқа районларниң алақилири үчүн пайдилиқ дәп ейтилсиму, әмма бу алди билән или вадисидики хитай ишләпчиқириш қурулуш армийисиниң техиму раваҗлиниши вә хитай аһалилириниң уйғур районида техиму көпийишидә муһим рол ойнайдиған амиллардур.

Шинхуа агентлиқиниң хәвәр қилишичә, хитай даирилири 13-бәш йиллиқ пилан җәрянида уйғур райониниң йол қурулуши вә қатнаш лайиһәлири үчүн 29 милярд доллар мәбләғ салидиғанлиқини билдүргән болуп, мәзкур қатнаш вә йол қурулушлири пәқәт уйғур дияриниң ичидила әмәс, бәлки уйғур дияри билән хитай өлкилирини туташтуридиған һәр хил қатнаш вә йол қурулушлирини раваҗландурушқиму қаритилған икән.

Пикирләр (0)
Share
Толуқ бәт