Xitay ili deryasigha séliwatqan 3-chong köwrükni püttürüsh aldida

Muxbirimiz ümidwar
2017-07-02
Élxet
Pikir
Share
Print

Xitay da'iriliri ili deryasigha séliwatqan 3-chong köwrükni téz püttürmekchi. Xitay axbarat wasitiliridin melum bolushiche, ili deryasining 3-pewqul'adde chong köwrüki dep atalghan mezkur köwrük ili deryasining tarmaq éqini bolghan künes deryasigha séliniwatqan bolup, buning pewqul'adde chong köwrük déyilishidiki seweb köwrükning omumi uzunluqi we kenglikige qaritilghan.

Tengri tagh toridiki xewerde ilgiri sürilishiche, mezkur pewqul'adde chong köwrükning uzunluqi 1117 métir, kengliki 24 métir kélidiken. Bu köwrük ili deryasidiki biwasite ghuljigha baridighan chong köwrüktin 816 métir uzun iken. Mezkur üchinchi köwrük bu yil 9-ayda püttürülidighan bolup, bu qurulush üchün 90 milyon som ajritilghan.

Ismini ashkarilashni xalimaydighan bir Uyghur ziyalisining éytishiche, ili deryasigha sélin'ghan bu köwrükler we Uyghur rayonidiki qatnash eslihelirining rawajlandurulushi ili wadisi qatarliq jaylar bilen bashqa rayonlarning alaqiliri üchün paydiliq dep éytilsimu, emma bu aldi bilen ili wadisidiki xitay ishlepchiqirish qurulush armiyisining téximu rawajlinishi we xitay ahalilirining Uyghur rayonida téximu köpiyishide muhim rol oynaydighan amillardur.

Shinxu'a agéntliqining xewer qilishiche, xitay da'iriliri 13-besh yilliq pilan jeryanida Uyghur rayonining yol qurulushi we qatnash layiheliri üchün 29 milyard dollar meblegh salidighanliqini bildürgen bolup, mezkur qatnash we yol qurulushliri peqet Uyghur diyarining ichidila emes, belki Uyghur diyari bilen xitay ölkilirini tutashturidighan her xil qatnash we yol qurulushlirini rawajlandurushqimu qaritilghan iken.

Toluq bet