Люксимборгтики хитай әлчиханисидин мисирдики тутқунда ғайиб қилинған илясҗан рахман сүрүштә қилинди

Мухбиримиз ирадә
2020-02-05
Елхәт
Пикир
Share
Принт

Хәлқара кәчүрүм тәшкилати мисирдики тутқундин кейин ғайип болған уйғур яш илясҗан рахман үчүн һәрикәткә өтти.

4-Феврал күни мәзкур органниң люксимборг шөбиси әзалири хитайниң шу йәрдә турушлуқ әлчиханиси алдида намайиш қилиш вә имза қоюш һәрикити уюштуруш арқилиқ илясҗан рахманниң ақивитини сүрүштә қилған. 

Люксембергниң «кроникол» намлиқ гезитиниң хәвиригә қариғанда, хәлқара кәчүрүм тәшкилати люксимборг шөбиси намайиш күни хитай һөкүмитидин илясҗан рахманни қоюветишни тәләп қилған. Улар алдинқи һәптила илясҗан рахман үчүн имза қоюш һәрикити башлиған болуп, һәрикәткә 900 дин артуқ киши аваз қошқан икән. 4-Февралдики намайиш күни шөбә башлиқи натали болтин хитай әлчиханисиға илясҗанни қоюветиш һәққидә мәктуб тапшурған. 

Елясҗан рахман 2017-йили июнда мисирда оқуватқанда туюқсиз тутқун қилинип, хитайға қайтурулған вә лагерға қамалғанлиқи тәхмин қилиниватқан 200 дин артуқ ғайиб уйғур оқуғучиниң бири. Шу чағда униң аяли уларниң иккинчи балисиға еғираяғ иди. Елясҗанниң аяли меһриниса абдуғени икки балиси билән түркийәдә панаһланмақта. 

2017-Йили 7-айниң бешида мисирда йүз бәргән уйғур оқуғучиларниң туюқсиз тутқун қилиш вәқәсидә ғайиб болған уйғур оқуғучиларниң қәйәрдә тутуп туруватқанлиқи, хитайға қайтурулғанларниң ақивити вә тәқдиригә алақидар мәсилиләр һелиһәм айдиңлашмиди. 

Хәлқара кәчүрүм тәшкилати хитай һөкүмитини уйғур елидики лагерларни тақашқа вә лагер тутқунлириниң ақивити һәққидә мәлумат берип, уларниң аилилири билән көрүштүрүшкә чақирип кәлмәктә.

Пикирләр (0)
Share
Толуқ бәт