Хитай ransomware интернет һуҗумида америкиниңму мәсулийити бар деди

Мухбиримиз шөһрәт һошур
2017-05-17
Елхәт
Пикир
Share
Принт

Җүмә күни дуня миқясида йүз бәргән вә 150 дин артуқ дөләттики компютер қолланғучиларни зәхимигә учратқан ransomware интернет һуҗуминиң җавабкарлири техи айдиңлашмай туруп, хитай мәтбуатлири америкини әйибләшкә башлиған.

Хитайниң йәршари вақти гезити вә хитай күндилик гезити мәзкур интернет һуҗуминиң җавабкарлиқиниң бир қисмини америка үстигә елиши керәкликини илгири сүргән. Хәвәрләрдә дейилишичә, рансам интернет һуҗумчилири дуняда 300 миңдин артуқ компютерға һуҗум қилип, униңдики һөҗҗәтләрни қулуплиған яки мәхпийләштүргән; буни әслигә кәлтүрүшниң бәдилигә компютер саһибидин 300 доллар тәләп қилған. Рансом һуҗумчилири бу арқилиқ 70 миң доллардин артуқ пулға еришкән. Мәлум болушичә, зиянға еғир учриған дөләт вә районлар русийә, украина, шундақла хитайниң шаңхәй, гуаңҗу қатарлиқ җайлири болуп, хитай тәрәп бир қатар тәдбир қоллиниш арқилиқ, рансом һуҗуминиң бәлгилик дәриҗидә алдини алған. Хитай тор бихәтәрлик даирилири хитайниң техи бу хил һуҗумларға қарита тәйярлиқиниң йетәрсиз икәнликини тилға алған.

Хәвәрләрдә дейилишичә, рансом һуҗумида америка дөләт бихәтәрлик идариси бурун қолланған вә кейин русийә тор һуҗумчилири тәрипидин оғриланған EternalBlue намлиқ техникини қолланған болғачқа, хитай тәрәп бу қетимқи интернет җинайитиниң бир қисмини америка үстигә елиши керәкликини илгири сүргән. Әмма, нюйорк вақти гезити һуҗумда шималий корейәниң қоли барлиқини, әмма хитайниң өз шерикини тилға алғуси кәлмәйватқанлиқини язған.

Хитайниң тор даирилири тор дунясини башқурушта американиң һөкүмран орунда туруватқанлиқини, бу җәһәттә бир күч тәңпуңлуқи шәкиллиниши керәкликини тәкитлигән.

Пикирләр (0)
Share
Толуқ бәт