Уйғур мәсилисидә җим турувалған дуня ислам һәмкарлиқ тәшкилати кәшмир мусулманлири мәсилисидә һиндистанни агаһландурди

Мухбиримиз ирадә
2019-08-15
Елхәт
Пикир
Share
Принт

Хитай һөкүмитиниң уйғур елида аз дегәндә икки милйон уйғурни қайта тәрбийә лагерлириға қамап, уларни җисманий вә роһий җәһәттин еғир қийнақлардин өткүзүватқанлиқи америка қатарлиқ ғәрб әллири тәрипидин қаттиқ әйиблиниватқан бир пәйттә бу мәсилидә җим турувалған дуня ислам һәмкарлиқ тәшкилатиниң бүгүн кәшмир мәсилисидә һиндистанни әйибләп баянат бериши кишилик һоқуқ көзәткүчилириниң тәнқидигә учриди.

Өзини «дуня мусулманлириниң ортақ авази» дәп атайдиған ислам һәмкарлиқ тәшкилати 15-авғуст күни өзиниң твиттердики рәсмий һесаби арқилиқ баянат елан қилип, «дини һоқуқларни рәт қилиш хәлқаралиқ кишилик һоқуқ қанунлирини дәпсәндә қилғанлиқ шундақла йәнә дуняниң һәрқайси җайлиридики мусулманларниң көңлигә еғир азар бәргәнликтур. Биз һиндистан даирилириниң кәшмир мусулманлириниң дини һоқуқлирини капаләткә игә қилишини тәләп қилимиз,» дегән. 

Мәзкур баянат дәрһал твиттердики кишилик һоқуқ көзәткүчилириниң диққитини қозғиди. Кишилик һоқуқни көзитиш тәшкилати канада шөбисиниң башлиқи фәридә дияз буниңға инкас қайтуруп, ислам һәмкарлиқ тәшкилатиниң юқириқи сөзиниң тоғрилиқи, әмма охшаш әһвалниң бүгүн уйғур елидики милйонлиған мусулманларниңму бешиға келиватқанлиқини әскәрткән. Фәридә ханим твиттердики сөзидә «уйғур мусулманлириниң дини һоқуқлири пүтүнләй чәкләнгән болсиму, ислам һәмкарлиқ тәшкилати буниңға бир қетимму аваз чиқармиди, хитай һөкүмити буни өзигә йеқилған йешил чирағ дәп қариди» дегән. 

Дуня ислам һәмкарлиқ тәшкилатиниң баянати йәнә твиттерниң нурғун әзалириниң тәнқидигә учриған. Улар дуня ислам һәмкарлиқ тәшкилатини уйғур мәсилисидиму охшаш ипадә билдүрүшкә чақирған. 

Дуня ислам һәмкарлиқ тәшкилати хәлқарадики нурғун кишилик һоқуқ органларниң чақириқлири вә күчлүк җамаәт пикригә қаримай уйғур мәсилисидә сүкүт қилишни давам қилмақта. Мәзкур органға әза сәуди әрәбистан, қатар, бәһрәйн қатарлиқ нурғун мусулман дөләтлири хитайниң уйғурларға йүргүзүватқан сиясәтлирини қоллап очуқ хәт язған 37 дөләт қатаридинму орун алған.

Толуқ бәт