Uyghur mesiliside jim turuwalghan dunya islam hemkarliq teshkilati keshmir musulmanliri mesiliside hindistanni agahlandurdi

Muxbirimiz irade
2019-08-15
Élxet
Pikir
Share
Print

Xitay hökümitining Uyghur élida az dégende ikki milyon Uyghurni qayta terbiye lagérlirigha qamap, ularni jismaniy we rohiy jehettin éghir qiynaqlardin ötküzüwatqanliqi amérika qatarliq gherb elliri teripidin qattiq eyibliniwatqan bir peytte bu mesilide jim turuwalghan dunya islam hemkarliq teshkilatining bügün keshmir mesiliside hindistanni eyiblep bayanat bérishi kishilik hoquq közetküchilirining tenqidige uchridi.

Özini "Dunya musulmanlirining ortaq awazi" dep ataydighan islam hemkarliq teshkilati 15-awghust küni özining twittérdiki resmiy hésabi arqiliq bayanat élan qilip, "Dini hoquqlarni ret qilish xelq'araliq kishilik hoquq qanunlirini depsende qilghanliq shundaqla yene dunyaning herqaysi jayliridiki musulmanlarning könglige éghir azar bergenliktur. Biz hindistan da'irilirining keshmir musulmanlirining dini hoquqlirini kapaletke ige qilishini telep qilimiz," dégen. 

Mezkur bayanat derhal twittérdiki kishilik hoquq közetküchilirining diqqitini qozghidi. Kishilik hoquqni közitish teshkilati kanada shöbisining bashliqi feride diyaz buninggha inkas qayturup, islam hemkarliq teshkilatining yuqiriqi sözining toghriliqi, emma oxshash ehwalning bügün Uyghur élidiki milyonlighan musulmanlarningmu béshigha kéliwatqanliqini eskertken. Feride xanim twittérdiki sözide "Uyghur musulmanlirining dini hoquqliri pütünley cheklen'gen bolsimu, islam hemkarliq teshkilati buninggha bir qétimmu awaz chiqarmidi, xitay hökümiti buni özige yéqilghan yéshil chiragh dep qaridi" dégen. 

Dunya islam hemkarliq teshkilatining bayanati yene twittérning nurghun ezalirining tenqidige uchrighan. Ular dunya islam hemkarliq teshkilatini Uyghur mesilisidimu oxshash ipade bildürüshke chaqirghan. 

Dunya islam hemkarliq teshkilati xelq'aradiki nurghun kishilik hoquq organlarning chaqiriqliri we küchlük jama'et pikrige qarimay Uyghur mesiliside süküt qilishni dawam qilmaqta. Mezkur organ'gha eza se'udi erebistan, qatar, behreyn qatarliq nurghun musulman döletliri xitayning Uyghurlargha yürgüzüwatqan siyasetlirini qollap ochuq xet yazghan 37 dölet qataridinmu orun alghan.

Toluq bet