Italiyede saqchilar bilen xitay köchmenliri toqunushti

Muxbirimiz méhriban
2016-06-30
Élxet
Pikir
Share
Print

Melum bolushiche, italiyening florénsa shehiri sésto fiyoréntino rayonida, saqchilar bilen xitay köchmenliri arisida toqunush yüz bergen. Mezkur weqe heqqide xitayning yer shari waqti géziti we italiye taratquliri perqliq xewer bergen. Xewerlerde körsitilishiche, weqe 29 -iyun kechte bashlinip, 30-iyun seherde bésiqqan. Weqede ikki xitay ishchisi qolgha élin'ghan.

"Yer shari waqti" gézitining 30 -iyundiki xewiride 29 -iyun chüshtin kéyin florénsa saqchiliri bir zawutni tekshürüshke kelgende, xitay ishchiliri bilen saqchilar arisida sürkilish yüz bérip, weqening tereqqiyati saqchilar bilen xitay ishchiliri arisidiki toqunushqa aylan'ghanliqi xewer qilin'ghan. Xewerde yene florénsa shehiridiki xitay konsulining weqege arilashqanliqi we italiye hökümitidin saqchilarning qanunni edep bilen ijra qilishni, xitay puqralirining heq -hoquqini qanun boyiche qoghdashni telep qilghanliqi bayan qilin'ghan.

Emma "Yer shari waqti" gézitining xewiride, zawutning qandaq zawut ikenliki, ishchilar bilen saqchilar arisida toqunushning néme sewebtin yüz bergenliki heqqidiki tepsilatlar bérilmigen.

Italiye ansa xewer agéntliqining mezkur weqe heqqidiki xewiride bolsa, xitay ishchilarning zawutning ijazetnamisini tekshürüshke kelgen italiye saqchilirigha qarshiliq körsetkenliki eskertilip, weqening chongiyishigha, ikki terep otturisidiki talash-tartishta bir xitay ishchining saqchilargha qarshiliq körsitishte qolidiki 10 ayliq bowaqni qalqan qilip paydilan'ghanda, balining uning qolidin chüshüp ketkenliki seweb bolghanliqi tilgha élin'ghan. Melum bolushiche, yéqinqi yillardin buyan dunyaning her qaysi jaylirida ishlewatqan xitay ishchiliri bilen yerlik ahaliler we saqchilar arisida öz ‏-ara toqunushidighan hadisiler körünerlik köpeygen. Xitay weziyet analizchiliri bundaq weqelerge xitay köchmenlirining bu döletlerning qanunigha xilap halda qurghan saxta tawar ishlesh zawutliri yaki xitay shirketlirining yerlik ishchilarning qanuniy heqlirini ayaq-asti qilghanliqi qatarliq amillar seweb bolghanliqini ilgiri sürmekte.

Toluq bet