Болливодниң даңлиқ кино чолпини җеккий широфниң уйғур әвлади икәнлики хәвәр қилинди

Мухбиримиз ирадә
2018-02-01
Елхәт
Пикир
Share
Принт

Биринчи феврал күни һиндистанда чиқидиған «әркин ахбарат жорнили» да елан қилинған мәхсус хәвәргә қариғанда, һиндистанниң киночилиқ мәркизи болливодниң даңлиқ кино чолпанлиридин бири болған җеккий широфниң әҗдадлири уйғурларға тутушидикән.

Хәвәрдә дейилишичә, биринчи феврал күни 61 яшқа киргән җеккий широф өзи рол алған филимләрдики таланти сәвәблик «болливод қәһримани» дәп аталған икән. Униң туғулған күни мунасивити билән елан қилинған хәвәрдә униң ата-анилириниң уйғур дияридин алди билән лаһорға көчүп чиққанлиқи, кейин деһли вә ахири бомбайға йәрлишип қалғанлиқи йезилған. 

Җеккий широф тонуштурулған йәнә бир тор бәттә ейтилишичә, җеккий широф 2017-йили һиндистандики раҗа сабһа теливизийәсиниң зияритини қобул қилғанда өзиниң келип чиқиши һәққидә тохтилип, момисиниң әсли йәкәнлик икәнликини, момисиниң аилиси билән бирликтә 1900-йиллар әтрапида хитайлар шәрқий түркистанни бесивалғандин кейин лаһорға қечип кәлгәнликини ейтқан икән. 

«Әркин ахбарат журнили» ниң хәвиридә, җекки широфниң һармас-талмас тиришчанлиқ нәтиҗисидә болливодтики «а дәриҗилик даңлиқ чолпан» ға айланғанлиқи, униң нами чиққандин кейинму балилиқини өткүзгән кичиккинә өйини унтуп қалмай һәптидә бир қетим зиярәт қилип турғанлиқи баян қилинған. Мәлум болушичә, җеккий широфниң 27 яшлиқ оғли тайгер широфму даңлиқ кино артиси икән.

Толуқ бәт