Bolliwodning dangliq kino cholpini jékkiy shirofning Uyghur ewladi ikenliki xewer qilindi

Muxbirimiz irade
2018-02-01
Élxet
Pikir
Share
Print

Birinchi féwral küni hindistanda chiqidighan "Erkin axbarat zhornili" da élan qilin'ghan mexsus xewerge qarighanda, hindistanning kinochiliq merkizi bolliwodning dangliq kino cholpanliridin biri bolghan jékkiy shirofning ejdadliri Uyghurlargha tutushidiken.

Xewerde déyilishiche, birinchi féwral küni 61 yashqa kirgen jékkiy shirof özi rol alghan filimlerdiki talanti seweblik "Bolliwod qehrimani" dep atalghan iken. Uning tughulghan küni munasiwiti bilen élan qilin'ghan xewerde uning ata-anilirining Uyghur diyaridin aldi bilen lahorgha köchüp chiqqanliqi, kéyin déhli we axiri bombaygha yerliship qalghanliqi yézilghan. 

Jékkiy shirof tonushturulghan yene bir tor bette éytilishiche, jékkiy shirof 2017-yili hindistandiki raja sabha téliwiziyesining ziyaritini qobul qilghanda özining kélip chiqishi heqqide toxtilip, momisining esli yekenlik ikenlikini, momisining a'ilisi bilen birlikte 1900-yillar etrapida xitaylar sherqiy türkistanni bésiwalghandin kéyin lahorgha qéchip kelgenlikini éytqan iken. 

"Erkin axbarat zhurnili" ning xewiride, jékki shirofning harmas-talmas tirishchanliq netijiside bolliwodtiki "A derijilik dangliq cholpan" gha aylan'ghanliqi, uning nami chiqqandin kéyinmu baliliqini ötküzgen kichikkine öyini untup qalmay heptide bir qétim ziyaret qilip turghanliqi bayan qilin'ghan. Melum bolushiche, jékkiy shirofning 27 yashliq oghli taygér shirofmu dangliq kino artisi iken.

Toluq bet