Xitay, imam jüme tahirning ölümige chétishliq dep qarighan ikki gumandarni étip tashlighanliqini élan qildi

2014-07-31
Élxet
Pikir
Share
Print

Xitay saqchi da'iriliri bügün héytgah meschitining imami jüme tahirning öltürülüshige chétishliq dep qarighan ikki kishini étip öltürdi. Bir kishini qolgha aldi. Shinxu'a agéntliqi bügün bu heqte tarqatqan uchurida, turghun tursun, memetjan remtulla, nurmemet abdilimit qatarliq üch kishining radikal idiyining tesiri bilen chong ish chiqirip, tesir qozghash üchün qeshqer héytgah jamesining imami jüme tahirni öltürgenlikini éytqan.

Emma dunya Uyghur qurultiyi xitay hökümitining herikitini "Sotsiz ölüm" jazasi dep qattiq eyiblidi. Ular, étip öltürülgen ikki kishining peqetla gumandar ikenlikini, xitay saqchilirining bu kishilerning jinayitini ispatlimay turup, delil - ispat körsetmey turup, sot achmay turupla étip öltürüshining xelq'ara qanunlargha we xitayning öz qanunlirighimu xilap ikenlikini bildürdi.

Jüme tahirning öltürülgenliki heqqidiki xewer charshenbe küni tunji bolup istansimiz teripidin xewer qilin'ghandin kéyin, xitay hökümiti weqening rastliqini qobul qilishqa mejbur boldi. Xitayning shinxu'a agéntliqi peyshenbe küni uchur tarqitip, imam jüme tahirning 30 - iyul charshenbe küni seher waqti 06:58 minut ötkende pichaqliq hujumgha uchrighanliqini éytti. Arqidinla ular yene jinayet gumandarlirining étip öltürülgenlikini xewer qildi. Közetküchiler xitay hökümitining bu arqiliq xitay puqralirining könglini emin tapquzushni meqset qilghanliqini perez qilmaqta. Weqe Uyghur élining ichi we sirtida qattiq inkas qozghidi. Uyghur élining partkom sékritari jang chünshyen térrorchi - zorawan unsurlargha, diniy radikallargha qattiq zerbe bérish toghrisida yene qesem ichti.

Biraq, közetküchiler, qattiq zerbe bérish heriketliri kücheygenséri, rayondiki qarshiliqningmu küchiyip kétiwatqanliqini, xitay hökümitining emdi siyasitini özgertmey turup rayonda muqimliq yaritishning qéynliqini mulahize qilmaqta.

Toluq bet