Уйғур елидики сақчилар камера орунлаштурулған қара көзәйнәк ишлитишкә башлиған

Мухбиримиз шөһрәт һошур
2018-02-07
Елхәт
Пикир
Share
Принт

Хитайниң әқлий иқтидарлиқ назарәт қилиш әсваблири қатариға йүз тонуш камераси )аппарати( орунлаштурулған қара көзәйнәкниңму қетилғанлиқи мәлум болмақта.

«Вал-стрет журнили» ниң бүгүнки бу һәқтики хәвиридә баян қилинишичә, йүз тонуш камераси орнитилған қара көзәйнәкләрни уйғур дияридики сақчилар бу йиллиқ чаған һарписида пойиз истансилирида ишлитишкә башлиған вә бәлгилик үнүм қазанған.

Бу көзәйнәкни кочилардики муқим җайға бекитилгән көзитиш аппаратлириға селиштурғанда һәрикәтчанлиққа вә әмәлий қоллинишчанлиққа игә болуп, чоң аммиви сорунларда мөкүп яки қечип йүргән вә яки кимлик өзгәртип һәрикәт қиливатқан гумандарларни байқашта тезлик вә тоғрилиқ җәһәттин зор әвзәлликкә игә икән.

Хәлқара кәчүрүм тәшкилатиниң хитай ишлири тәтқиқатчиси вилям ний, бу әсвабниң хитай даирилиригә иҗтимаий җинайәтчиләрни тез байқаш җәһәттә имканийәт яритипла қалмастин, бәлки сиясий өктичи яки хитайдики хитай болмиған милләтләрдин болған гумандарларни тутуштиму асанлиқ яридиғанлиқини тилға алған вә буниңға қарита әндишисини ипадилигән. Хәвәрдә дейилишичә, бу көзәйнәк сақчилар тәрипидин өткән йилниң ахиридин башлап ишлитилишкә башлиған. Беҗиңдики LLvision ширкити бу әсвабни ясаш үчүн хенән, шәндуң вә уйғур аптоном районидики сақчи органлири билән бир йил һәмкарлашқан икән.

Мәзкур хәвәрдики учурлардин камера орунлаштурулған қара көзәйнәкниңму хитайда әң алди билән уйғур елидики сақчилар тәрипидин қоллинилғанлиқи мәлум болмақта. Игилинишичә, хитайниң учқучисиз айропилани (Drone) му әң аввал уйғур елида синақ қилинған, йәни 2014-‏йили 28-июлда йәкәндә йүз бәргән «елишқу вәқәси» учқучисиз айропилан тунҗи қетим ишлитилгән иди.

Пикирләр (0)
Share
Толуқ бәт