Uyghur élidiki saqchilar kaméra orunlashturulghan qara közeynek ishlitishke bashlighan

Muxbirimiz shöhret hoshur
2018-02-07
Élxet
Pikir
Share
Print

Xitayning eqliy iqtidarliq nazaret qilish eswabliri qatarigha yüz tonush kamérasi )apparati( orunlashturulghan qara közeynekningmu qétilghanliqi melum bolmaqta.

"Wal-strét zhurnili" ning bügünki bu heqtiki xewiride bayan qilinishiche, yüz tonush kamérasi ornitilghan qara közeyneklerni Uyghur diyaridiki saqchilar bu yilliq chaghan harpisida poyiz istansilirida ishlitishke bashlighan we belgilik ünüm qazan'ghan.

Bu közeynekni kochilardiki muqim jaygha békitilgen közitish apparatlirigha sélishturghanda heriketchanliqqa we emeliy qollinishchanliqqa ige bolup, chong ammiwi sorunlarda möküp yaki qéchip yürgen we yaki kimlik özgertip heriket qiliwatqan gumandarlarni bayqashta tézlik we toghriliq jehettin zor ewzellikke ige iken.

Xelq'ara kechürüm teshkilatining xitay ishliri tetqiqatchisi wilyam niy, bu eswabning xitay da'irilirige ijtima'iy jinayetchilerni téz bayqash jehette imkaniyet yaritipla qalmastin, belki siyasiy öktichi yaki xitaydiki xitay bolmighan milletlerdin bolghan gumandarlarni tutushtimu asanliq yaridighanliqini tilgha alghan we buninggha qarita endishisini ipadiligen. Xewerde déyilishiche, bu közeynek saqchilar teripidin ötken yilning axiridin bashlap ishlitilishke bashlighan. Béjingdiki LLvision shirkiti bu eswabni yasash üchün xénen, shendung we Uyghur aptonom rayonidiki saqchi organliri bilen bir yil hemkarlashqan iken.

Mezkur xewerdiki uchurlardin kaméra orunlashturulghan qara közeynekningmu xitayda eng aldi bilen Uyghur élidiki saqchilar teripidin qollinilghanliqi melum bolmaqta. Igilinishiche, xitayning uchquchisiz ayropilani (Drone) mu eng awwal Uyghur élida sinaq qilin'ghan, yeni 2014-‏yili 28-iyulda yekende yüz bergen "Élishqu weqesi" uchquchisiz ayropilan tunji qétim ishlitilgen idi.

Toluq bet